漢能大市值想起大躍進

本人「日做夜做」就係諗有什麼公司生意好做過PRADA（01913）─喺個「黑蚊蚊」嘅袋印個名上去就賺超過70%毛利（2014年7月中期報表毛利為71.8%）？所以我立刻搜尋本港上市市值超過超過1000億元，而毛利又超過70%嘅上市公司。果然物以罕為貴，只係搵到4間公司咁大把【表1】：

成日話香港澳門淨係得地產、賣手袋同開賭，估唔到「砌機」都可以咁有前途，市值竟然追得上大古地產（01972）與PRADA，毛利仲有多冇少？我有冇眼花？

漢能（00566）的主要業務是研發、設計及組裝太陽能薄膜整線生產線。2014年上半年度竟然有近99%的收入（約31.6億）來自母公司漢能控股及其有關公司；而應收賬款達60.7億，意味應收賬天文數字接近12個月！一番左手交右手，就造就漢能大股東李河君晉身《新財富》雜誌「2014年新財富500富人榜」首富。本年度以249%的升幅榮登彭博2014年最佳回報股票（國際類）【註】。如果冇睇過公司資料，我好懷疑漢能砌嘅其實唔係太陽能機，而係印鈔機……。

我再翻查香港及美國上市最大嘅太陽能同業，漢能嘅市值竟然幾乎係5間巨企嘅總和【表2】！

保利協鑫（03800）係全球最大嘅多晶硅和硅片生產商；First Solar安裝全球一半嘅太陽能薄膜，佢哋竟然同漢能嘅市值同毛利相差十萬九千里！

寫到呢到，我就記起《人民日報》一篇大躍進時期嘅名篇《人有多大膽，地有多大產》：

「這次壽張之行，是思想再一次的大解放。今年壽張的糧食單位產量，縣委的口號是『確保雙千斤，力爭三千斤』。但實際在搞全縣範圍的畝產萬斤糧的高額豐產運動。一畝地要產五萬斤、十萬斤以至幾十萬斤紅薯，一畝地要產一、兩萬斤玉米、穀子，這樣高的指標，當地幹部和群眾，講起來象很平常，一點也不神秘。一般的公社也是八千斤、七千斤，提五千斤指標的已經很少。至於畝產一、兩千斤，根本沒人提了。這裏給人的印象首先是氣魄大。」

算了吧，這些「機會」不是屬於我的，只能是屬於偉大的祖國的……。

註： bloomberg.com/news/2014-12-22/the-best-and-worst-investments-of-2014.html

作者及其基金持有部分上文提及的證券。

作者為基金經理，是證監會持牌人士。