《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2015年6月12日
好多上市公司老闆最大嘅理想，唔係點樣做好間公司。煲大間公司固然重要；最重要係大股東點樣可以有錢落袋，袋袋平安。漢能（00566）最近有報章報道指出，公司早前向員工推出股權認購計劃，以15%折讓賣股畀員工。點知5月20日一下子跌足47%再停牌，買咗股票 嘅員工真係喊三聲，呢啲咪「低莊」囉。
人和商業（01387）在2008年上市，當年賣點係佢獨一無二嘅生意模式——防空洞做地下商城，唔使畀地價仲可以賣七、八成毛利率，當年彤叔都係股東之一。但係點解得佢做冇人做，就不得而知啦。
當年的老闆好肯．秀麗【註】用一連串出讓項目嘅大刁煲起股價。2010年賣5個項目畀4個BVI買家就賺40億元人民幣，係咪勁先（最後爛尾就後話啦）？員工見股價向好，就以折讓價幫佢攞6.5億港元嘅貨；好肯．秀麗再而批股攞多18.6億港元；公司亦發咗前後兩筆共9億美元嘅高息債。啲錢用嚟做咩？梗係用嚟派高息啦，大股東前前後後又收咗32.4億元股息。好肯．秀麗喺短短兩三年間袋咗幾多？答案係57.5億港元【表】！
大股東cap完水 業績打回原形
其實大股東作故仔搵水，都唔係第一日見啦。大股東最勁嘅係嚟一招華麗轉身，嘔返少少錢出嚟救公司，啲債主同小股東畀佢攞完着數仲要當佢神咁拜，又有得再番啅，咁先為之勁！
話說大股東cap完水，公司業績打回原形。收入由2011年20幾億元人民幣，跌到2012年及2013年分別6億幾同5億幾元人民幣。嗰9億美元高息債債權人即時腳仔震震，債價跌到最低5毫幾，股價更加唔在講，最差去到兩毫幾。公司2015年頭就有3億美元到期還，點算？
公司2014年11月宣布以每股3毫2二股供一股還債，條件係兩筆美元高息債要接受以93仙（2015年到期嘅3億美元債券）同82仙（2016年到期嘅6億美元債券）畀公司贖回。
最後債權人走夾唔唞，七成幾債券接受贖回。公司股價亦因為債務問題暫時解決而回升，2015年5個月時間升咗超過一倍半！股東仲唔多謝大股東？
其實計番條數，大股東不過拎番三成錢出嚟咋！好啦，公司股價上番去差唔多9毫子，大股東梗係又係時候諗吓點攞番嚿錢啦！公司最近表示考慮緊一單收購大刁，各位小股東睇路呀！
（編按：人和商業日前公布向主席戴永革配偶、 非執行董事張興梅持有67.86%的壽光地利，收購旗下8個農產品市場，作價65億元。當中50.2億元，擬按每股0.41元，發行約122.44億股代價股份支付，佔擴大後股本27.85%，餘下14.8億元以承擔貸款形式支付。）
註：據人和商業2014年年報，好肯．秀麗於2014年6月30日將其於耀山的全部權益作為饋贈轉讓予其胞弟戴永革。
於2014年12月31日，耀山透過其全資附屬公司超智間接持有人和逾153.837億股股份（佔已發行股本約48.49%）。
筆者是證券投資持牌人。筆者及與筆者有關的戶口持有以上股份及相關衍生產品權益。
放大圖片 / 顯示原圖
訂戶登入
| 下一篇： | 通脹未達標 量寬停不了 |
| 上一篇： | A股犯規成本低 散戶惟自求多福 |
