熱門:

2018年10月9日

方卓如 方如玉帥

樓價跌仲慘過買唔到樓

恒生指數收報26202點,下跌370點,成交965億元。人行降準,但市場唔覺得是好消息,反而確定係政府都知道經濟環境不妙,加深市場恐懼。又一次證明,消息本身冇話好與懷,全憑市場如何演繹。換言之,未來除咗美國總統特朗普突然間跟隨高錕遠去,否則市場唔會有任何好消息,咁先係最得人驚。

點解一場貿易戰會有咁強殺傷力, 搞到中港猶如變成玻璃之城,等待跌成粉碎,淪為碎片?第一輪500億美元貨品收25%關稅,第二輪2000億美元貨品收10%,都未加碼至25%,亦未涵蓋全部5000億美元中國對美出口,已經令中港股市同經濟風聲鶴唳。究竟係關稅本身打擊中港股市,還是中國準備應付關稅嘅招數,殺低了兩地股市?又或者,是貿易戰引爆了中港兩地本身嘅經濟問題,市場提早反映了未來經濟狀況?如果係後者,證明中港經濟都相當脆弱,一招關稅就戳破了經濟泡沫。

美國都唔可以捱得耐,照Ray Dalio預計,兩年內美元同美債都會大冧。美國人有足夠言論自由,可以唱衰自己國家未來,哪怕佢有利益衝突,持有空倉等跌獲利。如果佢估計正確,而家只係等邊個先出事。只係世界全球化,美元美債爆煲,你估只係美國受害?即是說,就算中港捱得過今次貿易戰,都未必捱得過未來美元美債爆煲。悲觀情緒未來兩年都揮之不去,大家坐穩。

碧桂園(02007)江西減價賣樓,令早入市嘅買家即時輸錢,引發騷動。看官,香港政府成日話樓價高,話發展商囤積居奇,唧牙膏式賣樓。你試吓發展商如果明天七折賣樓,究竟係開心嘅人多,還是跳樓嘅人多。

過去兩年,高價買一手樓嘅家庭人數超過3萬,萬一發展商減價三成賣樓,呢3萬個家庭即時輸錢。可能未必係負資產,但輸錢嘅心情絕不好受,真正成為樓奴,被500呎綁住。樓價跌了三成,全港信貸即時收縮,銀紙供應減少,息口自然向上。你以為樓價跌好過癮?而家經濟血戰,樓價如果跌,你仲慘過買唔到樓。前輩話望自己發達都唔好望樓價跌,依然啱用。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads