熱門:

2018年9月28日

方卓如 方如玉帥

加息加得少仲得人驚

本港銀行終於跟隨美國加息,但大銀行只加八分一厘,可見多麼不情願。照道理銀行應該歡迎加息,可以多收利息,但拖到現在先肯加八分一厘,是否正如滙豐所講,加息前要考慮平衡社會實況,尤其是貿易戰令經濟放緩,還要加息是百上加斤?

美國經濟好,要加息嚟控制通脹,中國因貿易戰、美元債高企、人民幣滙價下跌,引發資金外逃、經濟下行,正處於放水收水進退兩難嘅階段。香港嘅經濟跟中國,未來一年唔慌好,反而貿易戰開打之際先嚟加息,大銀行只肯加八分一厘,證明佢哋見到咁嘅時勢,若加足四分一厘,將害苦好多客仔,反而得不償失。銀行加息可能係預期之內,唔令人吃驚,但加息加得少仲得人驚。

通常市場最大嘅敵人唔係市場參與者,而係市場規矩制訂人,即係政府。錯誤政策推冧市場嘅例子,在歷史上多不勝數,遠嘅唔講,美國唔救雷曼引發金融海嘯,中國推出熔斷機制整冧A股,香港八萬五玩殘樓市,市場往往被政府推冧。今日香港,樓市、股市都有被政府推冧嘅跡象,先講樓市。

政府最新又最有效嘅辣招係一手空置稅,逼發展商賣樓。空置稅唔畀發展商龜速賣樓,要盡快推出市場應市,等於股票沽貨沽得快,有龐大沽壓,價錢想升都難,相信呢個都係政府想得到嘅結果。

弊在推出嘅時機最差,如果升市嘅時候抽空置稅,可以冷卻樓價,但樓價見頂醞釀調整而又撞正開始加息,樓價即時被踩多腳。新地(00016)賣樓出絕招,兩成賣樓部分,三分二係招標而唔係公開發售。用呢個方法,賣唔晒嘅樓會冇咁難睇,如果八成賣唔去,仲有人敢入市買樓?要知道,減價賣樓,發展商賺少咗,準買家卻步,新買家即時身家縮水,高成數按揭變成負資產,是四大皆輸嘅局面。

市民成日想發展商減價賣樓,其實減咗價之後,你仲買唔到樓,銀行估唔足價,按揭更加艱難批畀你。想樓價跌而令自己可以買樓嘅,根本未買過樓,唔知樓市嘅世界點運作。所以前輩話,望自己發達都唔好望樓價跌,今日仍然啱使。

發展商曲線話畀政府聽現價賣樓唔容易,如果政府扮聽唔到,係要發展商減價為止,必定推冧樓市,到時又要諗救市招數。呢個時勢,又係益咗有現金嘅人出嚟執平貨,貧富懸殊又進一步拉開。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads