2018年10月2日
達里奧(Ray Dalio)分析債務危機,寫成書之後仲要免費任人下載,慌死大家唔知嚟緊會有大爆煲。依佢所講,債務擴張時,資產價格上升,當借到連實力欠奉嘅人都可以借錢時,借到盡頭就要收緊信貸。到時候,資產價格掉頭回落,落得快嘅就係泡沫爆破,完成一個債務循環。如果沒有槓桿,經濟增長只會緩慢向上。有槓桿倍數,經濟就可以快速增長。只要經濟增長足以支持債務負擔,新債源源不絕取代舊債,經濟就可以持續向上,有排都唔會爆煲。
雖然債務循環通常以爆煲作為終結,但如果100年後先爆,借貸者已經一命嗚呼,又何需擔心泡沫爆破?
美國強勢之際,達里奧估計兩年後美債爆煲,美元下跌三成,係好有吉士嘅預測。佢老人家名震江湖,唔需要靠譁眾嘅言論博上位,估中咗亦唔會生意大增,反正已經無人不識。肯斬釘截鐵警告兩年後出事,估錯就臨老過唔到世。點解願意咁大膽豁出去,講到咁大?
炒家心態,唔會無情白事益街坊,千祈唔好以為佢年紀大咗,與世無爭,覺得係自己責任拯救蒼生。美國人係虛偽作假嘅先驅,例如總統話中國領導人係朋友,真人騷比賽後台聽見令人作嘔嘅惺惺相惜,還有運動品牌借爭議人物賣廣告,達里奧都唔會係為救世而預言美債同美元爆煲。
達里奧事先張揚債務危機,以佢嘅份量,一定有人聽,寫埋書免費任睇,煞有介事,實有人跟。兩年後爆煲,一年後大家已經部署,全世界都驚爆煲而收回貸款,沽出資產,拒絕借貸,想唔爆煲都唔得。當你有影響市場嘅力量,你嘅預測就唔止係準定唔準嘅問題,係可否推動市場依你預期方向走嘅問題。達里奧咁用力sell兩年後美債美元爆煲論,佢直情係想推冧大市。
推銷爆煲論唔係個個都得,要好似達里奧咁,有成本書嘅分析,研究過去100年歷史,有充分理論基礎先有人信,有人跟。
訂戶登入
下一篇: | 龍門任搬 過海就是神仙 |
上一篇: | 從Trader心理談末日博士再發功 |