2018年10月3日
屯門掃管笏新樓盤開價貼市,一推清袋。有人話該內地發展商同港資發展商唔同,無意賺到盡,又有謂該發展商玩串了香港托市賣樓嘅風格,搞亂檔。事實上,發展商萬科(02202)早前喺秋季例會大聲話要「活下去」,賣樓套現如果唔夠6300億元人民幣,企業差不多要滅頂。而家賣區區一個屯門小樓盤,梗係用一個盡快沽清套現嘅價錢,難道仲跟你斤斤計較是否跌破一萬蚊一呎?活下去就是要極速逃亡,絕對唔會惜售。
2008年美國次按爆破,如果你睇番當年頭兩季嘅報紙評論,其實有唔少人指出次按同CDO風險極高,隨時爆破,曹仁超都寫過唔少。當然,冇人估到雷曼會執笠,引發強勁嘅金融危機。即是說,危機好多人可以睇得出,但timing同力度就冇人可以看準。
睇過Big Short呢本書或者套戲,可以見到有啲叻仔早咗兩年睇得準,萬一呢兩年捱唔過,佢哋睇得準都變輸家。有理由相信唔少人一早睇準沽空,只係大多數已經死於挾淡倉,無法笑到最後。
今次美國對付中國嘅金融危機,好多人都睇得出,同樣地冇人講到timing同力度。達里奧(Ray Dalio)大膽預測美債同美元兩年後會爆煲,如果佢估得中,即是說貿易戰兩年後就完,到時美國仲邊有能力同中國打貿易戰?前提是中國要捱得過兩年,兩年內邊個先冧,邊個就輸。
中國應戰嘅方法係自力更生,東北糧倉任重道遠。另一道武器係把民間財富收歸國有,加強政府資源調配嘅能力。馬雲話企業有100萬、1000萬時,錢是你的;有一億時,錢就不是你的。中國民企有多少個一億,全部都唔係老闆的,咁係邊個?在貿易戰咁凶險嘅環境之下,中國出人意表地有不同種類打擊企業生意的政策,教育、遊戲、燃氣、內房,無一幸免。加上貿易戰下瀕臨倒閉嘅廠商,中國正在自我製造大蕭條。上世紀三十年代大蕭條,就孕育了納粹德國。達里奧講得啱,要解決債務危機,先要當權者反省政策是否令平民百姓受惠,否則只會引來民粹主義,社會不穩。
今次金融危機來臨,破天荒地全世界一面倒睇淡,無一個出嚟話係幻覺,看來你都要思考如何活下去。
訂戶登入
下一篇: | 天涯何處不淪陷 |
上一篇: | 央行乏條件收水 澳元短倉部署增 |