2018年10月12日
估唔到休息之前趕得切遇到預期已久嘅冧市。美國冧3%多啲,未算股災,股災要冧一成以上先講得上。港股2015年試過冧2000點,昨日1000點貨仔,仲未算得上股災,如果即將有股災的話。
美國冧市,唔係壞事。全世界都奄奄一息,只有美國獨旺,令佢有恃無恐,對付全世界。而家美國都可以冧市,有機會連貿易戰都要暫停,以免同歸於盡。特朗普係唯一一個,唔睇民調作為政績指標,而係用股市指數量度自己豐功偉績嘅總統。股市下跌,佢會驚。今次美國終於識跌,有機會係救全世界嘅契機。
傳說中嘅跌市終於來臨,你有準備同膽量買平貨未?冧市買平貨人人都知,但身在其中你最睇唔透嘅係幾時見底回升,人類永遠想撈底嘅尖啄,一撈即升,到最後都係撈底不成,不斷悔恨,又要等下一次。金融危機通常一次比一次大鑊,大家都覺得有排捱,遲遲唔敢入市。今次如果係金融危機,又會維持幾耐?政府又是否有能力救市?記住,十年前印咗好多銀紙,除咗中國之外,銀紙在民間。冧市對好多人嚟講,係入市良機。冧市,救市,係近二十年嘅循環。到救無可救,政府毫無辦法,唯有打仗,將舊債同銀紙一筆勾銷,百廢待興,由頭嚟過。貿易戰是否就係現代戰爭?令中國要收集民間子彈準備應戰?今次如果係金融危機冧市,是否可以一如以往,以極速反彈回復正常結束?只有問題,沒有答案。
四年前總編輯找我寫專欄,當時百無聊賴,久未寫作後重新每日交稿,令我每晚有件工作,腦筋時常要活動起來,又要翻閱唔同資訊,四年來人是聰明咗。我本來以為本欄冇人睇,後來發覺原來幾多人睇。過去經歷佔中、大時代、股市升跌、樓價飆升,夜晚臨瞓前太用腦,對身體唔係太好。這四年經歷了許多,人大了,懂得感恩同隨緣,凡事唔使太執着,是命水。四年來,總結一句話,正如《大時代》所講,「股票市場,及早離去」,香港人過去嘅玩法已經行唔通,新玩法又唔輪到你,只可以轉行。本來有兩項職業,我認為係最聰明嘅人先可以做,股票同政治。但喺香港,呢兩行都冇得讓聰明人發揮。
辛苦晒所有編輯大人等我交稿至深夜;這欄目名稱是梁栢堅衝口而出的,多謝他,但個「帥」字是我改,更為貼切;多謝總編輯郭艷明,忍讓我咁耐;多謝所有我遇過嘅人,過去多多得罪,有怪莫怪。金盆洗手,擇日出山,後會有期。
訂戶登入
下一篇: | 今日大愚到明日之後 |
上一篇: | 架就自己丟 面就冇人畀 |