《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2020年1月6日
上周元旦大遊行，警方以爆發衝突為理由中途腰斬，而在遊行過程中，滙豐銀行成為破壞目標之一。位於中環滙豐總行嘅一對銅獅，日間被潑漆，夜後更遭淋上易燃液體焚燒，於2020年元旦上演一幕「紅燒獅子頭」。其後當然有好多戀棧死物嘅所謂正義之士予以譴責，更有指今次紅燒獅子頭，燒掉了上幾代港人嘅回憶。
關於呢對銅獅嘅詭異傳聞唔少，不過傳聞歸傳聞，阿Man在此不作深究。但呢對滙豐銅獅子又確係歷盡滄桑，獅身上嘅子彈痕，見證香港曾受日軍侵略戰火洗禮。1942年日軍佔領香港後，曾因當時物資貧乏，銅獅遭日軍「俘虜」至大阪，準備熔為軍火材料。所幸係一對銅獅最終幸免於難；而日軍戰敗後，美國更安排把銅獅子安全運回香港。
坊間一直流傳呢對銅獅子是滙豐風水吉祥物，如今被破壞後，已用木箱圍封待修，就算未至於破壞風水，成個木棺材咁笠住對獅子，都係大吉利是兼大煞風景。更有堪輿學家說，本用作化煞嘅銅獅，經歷過紅油、火燒再圍板，郁咗滙豐銅獅等於破咗個陣，短暫影響就係「損財傷兵」。
傳破風水陣 明星股失光環
其實所謂滙豐風水陣，有堪輿學家指早於舊中環天星碼頭拆卸時曾表示，滙豐整個「金磚不倒」風水布局已受損，因為前方天星碼頭嘅朱雀位受損。
阿Man對風水真係無乜研究，惟觀乎滙豐股價表現，又真係自從2006年舊天星碼頭拆卸後一直欠起色。
大市喺2007年創過歷史高位，當時滙控（00005）股價最高見過85.86元高位（按已除淨後比例計），也是歷史高位，但其後由於2008年美國引發金融海嘯，滙控一度需要供股，而股價最高至2018年2月，亦不過係重上76.9元，上周五收市價60.4元，仍較2006年未清拆天星碼頭前60至70元水平為低，即超過10年來股價幾乎原地踏步，甚至更差。而滙控過往擔當嘅港股火車頭角色，亦被新經濟股騰訊（00700）取代，作為大市明星股嘅光環早已失色。
今次有示威者針對滙豐，主要事源一個支持社會動運組織星火同盟嘅捐款戶口，懷疑被滙豐舉報，指戶口用途與開戶時不吻合，更遭警方懷疑涉及洗黑錢，結果戶口被凍結資產幾千萬。呢件事當然令社會運動支持者不滿，加上星火戶口在未有足夠洗黑錢證據之際已被凍結，更令客戶擔心在本港銀行的資產，隨時會因為被懷疑洗黑錢就輕易遭凍結封殺，難以得到應有保障。
滙豐銅獅被燒是否大破風水局致影響生意，目前暫難斷言，反而滙豐及旗下恒生（00011）或如中資銀行，將被摒諸已日漸成形嘅黃色經濟圈之外。黃色經濟圈有幾大威脅，暫時亦係未知數，不過當咁多主要官員及官媒連珠炮發，發表反對黃色經濟圈的言論，似乎其確切正在改變香港某部分人嘅消費習慣，甚至對香港本土經濟有一定影響力。
麥狄文（徐狄怡．證監會持牌人）
訂戶登入
| 下一篇： | 內地醫藥股再起波瀾 |
| 上一篇： | M&A大刁反轉再反轉 |
