2019年12月9日
隨着阿里巴巴(09988)順利今年內喺港股作第二上市,因其集資額龐大達百億美元,令港交所(00388)成為今年全球新股集資總額第一名交易所。雖然新股集資額成績驕人,但今年港股每日平均成交額卻差強人意,大部分時間每日平均成交額均不足800億港元,除咗係近大半年社會運動令本地投資者入場意欲大減之外,港股監管制度一直落後於人亦係令港股欠缺競爭力其中一個原因。單就股票實名制實施方面一拖再拖,本來證監會擬於今年上半年就實名制進行公開諮詢,但卻一直只聞樓梯響,嚟到今年最後一個月仍未有聲氣,恐怕要等明年商議。
有效提高市場透明度
環顧國際市場,股票實名制交易係大勢所趨,主要係實名制有助監管機構查處內幕交易、市場操縱、非法經營證券業務等不合規活動。實名制下,監管機構可即時監控股民買賣資料,不但可縮短調查時間,打擊不法活動阻嚇力更高。此外,股票實名制亦可以有效提高市場透明度。
其實內地股票市場一直以實名制運作,而去年9月,「港股通」北向交易亦率先實施實名制,不過南向交易以至整個港股市場,則未有同步。喺缺乏實名買賣數據下,港股監管出現滯後,不單令監管效率大打折扣,亦因為監管滯後,影響香港與其他市場合作。
實名制遲遲未能喺港股實行,當中一個較具爭議之處,係涉及私隱問題,部分投資者唔願意畀人洞悉其投資舉動,可能會減低入市意欲,而且證券行營運成本及資訊科技成本有可能會大增。大家可能會問阿Man,畀監管機構知道投資舉動其實有乜問題,點解要擔心呢? 當然一般正常投資者梗係唔覺有問題,但係有另類投資者,舉個例子就係一般被稱為莊家嘅大戶,因為港股未有實名制,就可以利用不同名義開設多個戶口,喺唔同證券行進行交易,呢啲戶口亦俗稱「人頭倉」。透過呢啲戶口,莊家可以方便操控股價、影響股東投票結果、隱瞞實際持股量等等失當行為,監管機構實在難以監管。
而上述莊家操控問題,通常出現喺市值較細嘅三四線股份上面,而近年證監會已頻頻出招打擊莊家活動,希望借此洗去過去多年以嚟,細價股不法活動充斥市場下,港股被稱為老千股天堂嘅污名。不過針係無兩頭利,證監會大力打擊莊家活動嘅同時,雖然令老千股活動減少,但唔少做開莊家生意嘅本地華資經紀行,喺細價股活躍度大減,甚至幾乎死直之後,經營亦愈嚟愈困難。
須配合國際監管趨勢
不過隨住金融科技應用愈趨普及,應用科技提升市場透明度,全球主要市場亦已相繼落實採用實名制,喺2008年美國爆發次按危機後,國際金融監管組織─金融穩定委員會(FSB)提出建立「法定實體識別編碼」(LEI),以識別不同金融交易中嘅實體,目前多個主要市場包括歐美嘅監管機構已參與。喺全球監管一體化大環境下,港股要融合國際金融監管大氣候,實在刻不容緩。
只不過實際上如何操作,如透過基金投資要如何執行實名制,沽空機構披露投資舉動,協調交易商應付所需軟件及資源掌握等等,都需要監管機構跟業界及公眾盡快進行諮詢,方可制訂一個具體可行嘅方案。至於中小型經紀,即俗稱C組經紀如何與時並進,繼續喺市場搵到生存空間,亦係業界另一個值得思考嘅問題。
麥狄文(徐狄怡.證監會持牌人)
放大圖片 / 顯示原圖
訂戶登入