熱門:

2019年12月2日

麥狄文 金融街密語

股仔暴跌又係追孖展惹的禍

近呢兩個星期,又多咗股仔單日高台跳水,而喺11月21日嗰個星期四,一天之內更見兩股單日急跌九成後停牌。先講講雅高控股(03313)由年初0.335元低位,離奇地唧高44倍,去到暴跌前嘅高位14.96元。至於一直升嘅原因都係一個謎,除咗間中傳出將引入中資大孖沙做股東,泊個靚碼頭之外,實實在在真係無原因下狂升。唯一解釋係呢隻貨喺2013年底以2.65元招股價上市,IPO時認購不足,繼而股價節節下跌,經過咁多年有心人收集後,貨源應該極為歸邊,咁股價就算炒到外太空,只要無人沽貨的話,股價自然可以一直維持喺高水平。

雅高股價一直升,市值亦漲至百億元計,去到呢個晒士,造就雅高被MSCI納入作中國指數成分股,雅高股價亦因為呢個消息創下14.96元新高。本來幕後有心一直唔沽貨的話,只要雅高一加入MSCI呢個大家庭,相關指數基金被動式焗住掃貨,對超高外太空價仍會有支持。

雅高股東傳「晒磚頭」借錢托價

不過MSCI經一輪協商後,最終將雅高拒諸門外,消息一出,股價即暴跌,雖然低位都有反彈,不過股價跌至0.191元低位,就算反彈超過100%,至上周五收市報0.41元,相比高位仍然暴跌超過九成,市值得番不足12億,與高峰時逾400億比,小股東當然係血本無歸。

其實雅高被MSCI取消資格嘅消息,本來唔應該有咁大威力,令股價單日跌逾九成,不過加埋追孖展不成斬倉嘅威力,咁又唔同講法,連鎖效應之下,係會不斷加深其沽壓,令到人踩人嘅情況出現加速跌勢。阿Man收到風,雅高未爆出被MSCI放棄嘅消息前,股價喺高位都唔會頂得幾耐,皆因單靠貨源歸邊,由自己友不斷交波搓高股價,始終都有成本。據聞雅高喺爆煲前,主要股東嘅股份已經按咗唔知幾多勻,老友話雅高其中一個主要股東,就曾經晒冷式向卜架行盡show所有物業資料,為求借番一千幾百萬孖展「做嘢」。雖然嗰堆磚頭嘅價值,閒閒地都過億,正路要借十球八球錯唔係問題。問題出於嗰位股東嘅雅高股份,其實已經按完再按,基於風險管理原則,最終卜架行都係斗零都唔借。

講到因為斬倉而暴跌嘅股份,跟雅高同日暴跌九成嘅卡森國際(00496),經過一個星期反彈後,股價都算收復大部分失地,上周五收市3.48元,都只係較暴跌前4.8元跌咗唔夠三成,但以低位0.435元計,則反彈咗800%。卡森當日急跌嘅原因係被沽空機構「殺人鯨資本」狙擊,指公司去年發展嘅柬埔寨經濟特區項目有名無實,不過卡森已強烈否認殺人鯨資本有關報告,並指報告涉及不準確及具誤導性,董事會更議決設獨立董事委員會,稍後或就呢件事採取適當行動。

卡森有效率地應對呢件事,令股價迅速反彈。都係嗰句,真金不怕洪爐火,聽聞卡森被狙擊當日,本來股價只係跌咗唔夠兩成,聽聞其中有個卜架表現相當驚青,見客戶孖展倉坐咗貨,借咗些少孖展,慌死個客冇錢找數,未待客人入錢填孖展倉,已急不及待將客戶嘅貨強行沽出。

由於卡森交投一向唔算活躍,呢個突如其來幾球嘅沽盤,仲要不限價咁掟貨,惹嚟其他卜架加入啪貨行列,當日卡森喺不足1億股成交下,股價好無辜咁跌咗九成後停牌。翌日卡森股價以逾3億成交回升,以上周一股價繼續反彈,雖然股價因為有短炒盤獲利而未能企穩4元,但較低位反彈咁多,都算係咁。其後聽聞有關卡森嘅孖展倉都冇穿冇爛,反映幕後玩家都有番咁上下實力。

麥狄文(徐狄怡.證監會持牌人)

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads