熱門:

2019年12月23日

麥狄文 金融街密語

鄭少爺主理新創建 打造集團另一明星

仲有兩日就到聖誕節,雖然今年香港係不平凡嘅一年,由初夏走到冬天嘅社會運動仍未有跡象停落嚟,唔少香港人,尤其年輕一輩,都冇乜心情去慶祝聖誕節。

雖然係咁,呢個每年一度嘅重要節日,始終都仲係有人重視,而聖誕節其中一個傳統就係交換聖誕禮物。為咗搜羅聖誕禮物,已經幾個月冇乜去行街濕平嘅阿Man,呢幾日都出咗去行商場。

位於尖東海旁嘅K11 MUSEA都開咗一段時間,今次就決定去睇吓有冇心水禮物啱買。本來諗住速戰速決慳時間,買完嘢就鬆人,但結果阿Man竟然喺呢個商場花咗兩粒幾三粒鐘行商場,係真真正正的行商場。

呢個新商場注入大量藝術元素,確係非一般行街濕平嘅體驗。至於有乜特別,就真係要親身走一轉先可以體會得到。

不過呢個商場又或者之前喺尖沙咀另一個新世界(00017)商場項目K11,可以話打破咗過往香港傳統商場行街購物經驗,而打造呢兩個項目嘅新世界富三代鄭志剛,當然要記一功。

作為本港四大地主之一嘅新世界,自從10年前由第三代少爺入主後,的而且確令新世界有煥然一新嘅感覺,單係將商場引入藝術元素呢個概念,已經係一個大膽及創新概念,大大提升咗行商場消費嘅樂趣,而商場嘅設計亦反映出項目策劃人嘅品味。

K11 MUSEA有睇頭

對於品味嘅嘢睇法人人唔同,不過鄭少爺喺做生意呢方面嘅能力,確係有目共睹,至少K11 MUSEA以及今年啟用嘅Rosewood酒店(瑰麗酒店),已經成為香港新地標之一。

鄭少爺為新世界注入活力,尖東海旁項目完成,更加成為今年嘅城中熱話之一。

同系嘅新創建(00659)一向俾人嘅形象就係公共交通工具新巴同新渡輪營運者角色,似乎都冇乜大作為,甚至唔少人已忘記新創建其實係新世界集團旗下嘅投資旗艦。既然鄭少爺用咗10年時間打番響新世界個朵,都係時候擺啲時間關注一吓新創建呢隻投資旗艦。

睇番公司通告,鄭少爺喺今年10月11日正式獲新創建委任為執董,似乎新創建靜極思動,未來跟阿媽新世界喺業務上或會有更緊密嘅聯繫。

發展健康生態圈

點解阿Man會有咁嘅睇法,主要係新創建喺今年11月1日已完成收購富通保險,為目前新創建超過七成應佔經營溢利來自收費道路、飛機租賃及建築業務注入另一動力,預期富通保險將會成為新創建未來收入嘅新亮點。阿Man仲收到風,富通保險將會跟新創建旗下私家醫院港怡醫院喺業務上加強合作,預期將產生協同效益。

近年中高收入人士對於體檢愈來愈重視,而港怡醫院除咗提供一般私家醫院住院服務之外,重點業務就係體檢中心,體檢呢門生意有一定發展潛力。至於富通保險跟港怡醫院可以點樣同新世界業務發生聯繫,就要數到新世界旗下嘅仁山優社,主要提供復康服務,即係喺新世界同系公司,可以提供醫護及復康一條龍服務,再加埋富通提供保險服務,似乎係打造健康生態圈。

健康生態圈業務發展仍然處於起步階段,將來成效依然有待時間印證。不過,睇番鄭少爺喺商場項目嘅成績,沉寂多年嘅新創建,話唔定喺少爺主理後,再經過雕琢打磨之後,未來會成為新世界系內另一明星。

筆者沒有持有新創建或同系股份

麥狄文(徐狄怡.證監會持牌人)

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads