熱門:

2020年2月10日

麥狄文 金融街密語

國際都會疫情下醜態盡現

武漢肺炎疫情持續,完全未見有緩和跡象,全城鬧口罩荒不特止,搶清潔消毒用品變為生活日常,邊度有口罩或酒精搓手液等抗疫用品賣嘅地方就見人龍。最悲哀嘅係,上周竟然因為社交平台瘋傳香港封關後,日用品稍後亦可能出現供應問題,搞到全城瘋搶食米、廁紙、抹手紙、衞生巾,甚至避孕套!

恐廁紙步口罩後塵

一個國際都市出現咁嘅情景,可以話可笑又可悲,甚至係醜態盡現。可笑嘅係資訊發達,令網絡謠言更快速傳播嘅同時,原來普羅大眾係完全唔識分辨資訊真偽,以一個國際都市嚟講,市民知識水平竟然可以如此低落。可悲嘅係,作為一個先進城市,竟然有市民相信香港封關後,將如同死城,可能出現物資短缺嘅情況。

講到尾都係市民對政府信任度低,寧願囤貨都唔相信物資供應正常,由於喺口罩供應方面,政府冇做任何協調,令到市民「一罩難求」,又或不法無良商人將口罩炒至天價,又難怪升斗市民一聽見任何傳聞,有理冇理都搶咗先,怕廁紙供應步口罩後塵。

其實,目前除咗醫療用品出現全球供應緊張之外,其他日用品及糧食供應正常,尤其香港係一個國際都市,糧食及日用品等唔係單靠內地供應,除咗Made in China之外,其實仲有好多其他國家同城市嘅選擇。

對於近日大家喺超市見到貨架經常空空如也,除咗係民眾不理智搶購之外,新年假期唔少中港車司機其實仍然休假,喺物流運輸方面人手確係少咗,間接令部分來自內地嘅產品輸入速度慢咗。

提款機都傳無現鈔

另一方面,透過國際郵遞中心嘅空運貨物,亦因為郵政服務只有限度運作而受阻,大量貨物囤積喺關口未清關,有貨冇人分發。與此同時,運輸工人亦有部分未完全返回工作崗位,人手減少令貨品由倉庫送至各超市分店嘅速度慢咗,對於一切日常用品供應,阿Man真係未擔心過。

偏偏就有人惟恐天下不亂,抗疫時期仲散播謠言,搞到人心惶惶,係咪有不法商人借謠言散貨,實在難以查證,但大家應該小心分辨消息來源及真偽,唔好人搶你又搶。就好似喺新年假期後,多間本地銀行分行暫停營業,就見到提款機大排長龍,擔心有錢攞唔倒。

據阿Man八到,嗰段時間,確係有部分提款機嘅現鈔補充畀平時慢咗些少,原因係上周運輸署都關閉,部分解款車牌照到期,續牌無門,所以運鈔到各區提款機嘅解款車數目係少咗,自然補充現鈔亦會較慢。不過一兩日後,經過協調之後,提款機嘅提款服務完全正常。若然呢啲時候,又有人妖言惑眾,走去瘋狂提款,甚至搞到銀行擠提,你話幾咁無謂。

反而有個別行業服務,的而且確係受到疫情影響,好似上市公司核數工作,由於唔少本港上市企業都係內地企業,喺疫情影響下,會計公司為咗員工安全,以及內地唔少城市封城,嚴重影響核數工作。預計今年唔少上市公司嘅首季業績,都需要申請延期公布,唔多唔少打亂投資者部署。

核數師返唔到內地核數,就惟有延後公布業績,但喺金融呢一行,有啲崗位係避無可避,乜嘢情況下都要返公司。

鑑於疫情嚴重,政府已率先延長假期及鼓勵私人企業安排home office,只不過好似證券買賣嘅卜架行,就好難做到完全home office,皆因連接港交所(00388)嘅交易系統,係唔會有遙距控制,除非係嚴重到停市,否則前台交易員,又或後台交收工作嘅後勤員工,都要返公司處理。

呢段時間係爆發高峰期,唔可以留家工作嘅金融從業員,惟有做好防疫,自求多福。

麥狄文(徐狄怡.證監會持牌人)

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads