不可不知的PE高回報秘密

由於有部分「巴打」對PE（Private Equity，私募基金）不甚了解，高仁特意找來「行內人」本港私募基金GP的Ken陳，於上周分享不說不知的PE運作方式。本文，高仁與Ken陳及「豬朋狗友」戴Sir將繼續下半部的飯局，探討PE不可不知的高回報秘密。

高　仁：戴Sir，你係咪想知道VC係乜？咁要麻煩「巴打」阿Ken，請你繼續講解。

Ken陳：VC係PE其中一個種類，英文全名係Venture Capital，中文就叫風險投資基金，內地則叫創業投資基金。顧名思義，佢係一種專門從事風險投資嘅基金，主要投資喺一啲未上市但具有巨大競爭潛力嘅企業，屬於目前市場比較流行嘅投資方式之一。

戴孤劃：那麼VC有什麼特點呢？

高　仁：阿Ken，我又嚟幫下手先。VC嘅投資對象主要係一啲未上市小型、新興或剛剛成立嘅高新技術企業，故此VC投資階段主要集中喺企業發展初期或者擴充期。

Ken陳：高仁，唔該晒，等我嚟。VC嘅投資方式係透過注入資金或技術換取部分股權，務求促進企業業務迅速發展，最終目的是希望可以獲得資本增值嘅機會。VC投資周期一般係2年至5年，賺錢主要依靠企業上市或轉讓股權，投資回報率平均為20%至40%。

戴孤劃：VC套現了那麼多的資金，之後會怎樣辦？

高　仁：戴Sir，你唔使同佢哋擔心喎，只要VC所投資企業嘅股票上市，VC可以通過股票市場（高仁註：內地通常稱為二級市場）出售股權套現，之後資金又可以繼續投資喺其他風險企業。呢樣就好似佛教所講「輪迴」一樣，生生不息，可以再以錢搵錢。

戴孤劃：話說回來，為什麼PE可以體現這麼高的收益？

基金經驗彌補創業家不足

Ken陳：嗯……呢方面主要有4個原因：第一，PE嘅投資項目係由專業風險投資家經過嚴格篩選得嚟，投資對象都係一啲潛在市場規模大、高風險、高增長、高收益嘅行業，例如訊息技術、生物科技等等；第二，由於呢啲小型企業仲處於發展初期，佢哋要獲得銀行批出貸款比較困難，令PE投入嘅資金變得非常重要，故此亦可以獲得較大嘅股權。

高　仁：阿Ken，我相信第三個原因係，PE除咗可以為企業帶來資金之外，佢哋過往豐富管理經驗可以彌補創業家嘅不足之處，相信可以提高企業成功機會及縮短所需時間；第四，一旦企業被證明為成功，PE就可以功成身退，最終投資收益有可能係以百倍甚至千倍計。

公司上市或併購回報可觀

戴孤劃：如要PE功成身退實現盈利，之前說退出投資的多種方法，哪一種最好呢？

Ken陳：以目前嚟睇，企業上市係PE退出投資嘅最好方法，因為股票市場嘅估值溢價可以帶來理想嘅回報。M&A主要係同業之間嘅收購行為，屬於產業鏈整合過程，主要適合PE大規模投資後退出。至於管理層回購，係最差嘅退出方法，回報收益可能僅僅高過內地儲蓄年利率。

戴孤劃：「鐵哥們」，你們說的都是PE有盈利，但是PE會不會虧本呢？

高　仁：（轉用普通話回答）這樣也給你想到，戴Sir真不是「儍B」！我們呷過茶、吃過包，一會兒再說吧。

私募基金系列．之二

本欄逢周一刊出

如想與高仁交流上市公司的財技個案及招數，請電郵至 [email protected]。