挨年近晚全城水緊

仲有個幾月，2018年就過去，今年股市表現如何，大家心中有數。自今年3月中美貿易戰打出第一槍後，僅4月及5月曾見輕微反彈，其後連跌5個月。仲有個幾星期，11月亦過去，如大市未能重上二萬七大關，港股可以話衰足10個月。重磅股股價當然較1月高位跌到一仆一碌，細價股亦唔好得去邊，雖然期間偶有炒作，但整體氣氛當然唔多掂。

上周四又有一堆細價股忽然暴瀉，市場又傳聞四起，一時話有基金爆煲，更有消息話殼后亦手緊，忍唔住大開殺戒，斬咗一批細價股出街。據了解，上星期嘅細價股暴瀉完全唔關殼后事。可能係最近樓價下跌，令人聯想上半年由殼后line up嘅財團，由中資財團手上接過超人高達400億元嘅中環甲級商廈，為咗完成交易，當時透過投行發行高息票據，年期介乎18至24個月，年息率高達9至15厘。

由於呢批票據息率有番咁上下，單係利息支出都唔嘢少，加上近日樓市腳軟，甲級商廈呎價唔覺唔覺跌咗一成有多，難怪坊間有傳聞殼后都水緊。雖然呢一項商廈投資，殼后賬面計暫時損失係以10億元計，但以殼后豐厚身家，一百幾十億元都只係面嗰浸，應該唔會令殼后有周轉問題。

按磚頭套現陸續有來

不過挨年近晚，又確係傳出唔少城中富豪名人銀根緊絀。除咗上星期阿Man提到九頭身美女搵助手去財仔為兩個西半山物業嘅按揭問價外，阿Man聽聞近日唔少山頂優質物業求按，除咗係向銀行求救外，更有唔少山頂物業要搵埋財仔幫手。呢類按揭嘅年息絕對唔平，閒閒哋雙位數起跳，乜嘢P+三四五厘息完全不適用。有Banker指出，畀得十幾厘年息做按揭，除非只係做一年半載嘅過渡貸款，若年期超過18個月，通常按揭抵押品最終都會淪為銀主盤。

過往上市公司嘅主要控股股東每當有周轉問題，可以拎手上股份按倉借錢，但今時今日已冇呢支歌仔唱。自從舊年「謎網50」之後，好多證券行已唔多接受股仔按倉借貸。早排股壇長毛再整多批「謎網26」，最新鮮滾熱辣又多一批叫「瀕危41」嘅股份黑名單，指呢批股份隨時面臨被停牌甚至有除牌威脅。長毛三日唔埋兩日就整番批不能買的股份，股票行為免中招，索性二三四線股仔嘅孖展一律唔借，何況主要股東大手按倉套現，更加避之則吉。既然上市公司股份按倉借錢唔可行，唯有出動磚頭按揭套現。年關將至，估計會有更多磚頭拎嚟做按揭套現。換句話講，發球權喺有水放嘅金主手上，難怪呢期所承造嘅按揭，優質物業如甲級寫字樓，又或山頂豪宅，年息率要雙位數咁嚇人。

麥狄文（徐狄怡．證監會持牌人）