《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2018年10月22日
港股甫踏入第四季就唔多掂，由接近28000點水平跌至上周五接近25000點水平先識停一停。內地股市更慘不忍睹，上證指數跌穿2016年熔斷底後，上周更一度下破2500點心理關口。但阿爺上周五卒之派出「四大天王」救市，喺阿爺出口術之下，中港兩地股市低位反彈，未知呢一波反彈有多大能耐。
但港股肯定弱勢已成，先不論指數嘅上上落落，單係投資氣氛已被連續五六個月嘅跌市打擊得體無完膚，近大半年單日過千億元成交嘅日子愈來愈少，除IPO外，一般嘅批股活動幾乎陷入停頓局面。
阿Man呢期同sell side嘅朋友仔傾偈，大部分嘅話題都離唔開搵食艱難四個字，由於市場氣氛差到冇朋友，魚缸嘅批股活動買少見少。睇見「大鵰兄」呢期嘅社交平台，放得最多嘅post都係飲飲食食或消閒活動，跟過往市旺時大部分post都同佢做刁有關，例如大大小小嘅上市公司企業活動，「大鵰兄」一手包辦唔少公司批股集資嘅post已買少見少。連最吃得開嘅sell side金牌從業員都少咗生意做，更何況其他人。
買家攞貨10萬照殺
由於內地銀根一直緊絀，即使人行放水，亦只限對銀行進行定向降準，但真正流入資本市場嘅錢唔見得好多，企業能夠成功債冚債，可過到骨避免債務違約已經謝天謝地。香港呢邊嘅二三線股仔，企業融資固然難度高，最大鑊嘅唔係上市公司，因唔少公司喺去年旺市早已抽水，近日更趁大市回落頻頻出手增持，即係未去到山窮水盡嘅地步。
最慘係嗰批坐重貨嘅主要股東，尤其係二三線股仔嗰班，過往市旺想套現，只要撥個電話搵相熟經紀，畀幾個巴仙折讓，要出貨套現唔成問題，同時批股仲要規矩多多，接貨者至少要肯買咁上下嘅size，而且仲可能有一段時間禁售期。總之市旺時就係seller market，沽家惜貨如金，買家求貨若渴，只要條件唔太過分都可以接受。
但時移世易，今年港股表現每況愈下，港股嘅二三線公司要批股，已經由buyer主導市場。等錢使嘅主要股東，通常係大股東以外嘅第二或第三大股東，又或者係當初見股市形勢大好，幫大股東坐住大大批貨嘅莊家，如今想沽貨套現，簡直難過登天。而家買家攞幾多貨已經唔到沽貨人話事，聽聞有人但求去貨，由過往要求buyer接貨至少斷球計數，淪落到以十萬為單位都就範，折讓小過兩成更加冇得傾。最慘係單placement好多時去到埋門一腳，buyer臨時放飛機，甩飛或踢飛嘅情況十常八九，搞到最終單刁都係做唔成，難怪咁多sell side行家叫苦連天，呻連粥水都冇啖好食。
上周五股壇長毛又再發表新謎網股份，今次竟然連唔少有番咁上下份量嘅中型股份都榜上有名，股仔要批股抽水已經咁困難，如果連較大型嘅股份都話有問題唔買得，睇嚟港股嘅placement活動極有可能進入冰河時期，各從業員惟有自求多福。
麥狄文（徐狄怡．證監會持牌人）
訂戶登入
| 下一篇： | 低吸優質中國股良機 |
| 上一篇： | 牛市或延續 風險在增加 |
