熱門:

2018年10月8日

麥狄文 金融街密語

芬佬贍養費少到離譜映衰行家

香港離婚率一向高得緊要,從2012年起做嘅統計,至今每年離婚率一直高企三成以上,期間更出現超越四成嘅驚人數字,而香港離婚率更位於全球十大排名之內。根據香港嘅婚姻法,夫婦離婚之後,財產通常都係五五分家一人一半,當然雙方協議點樣分配亦可以。至於夫妻分居或離婚後,法津定義上亦有贍養費提供畀配偶,作為必需生活費用。

傳統上贍養費係由男方支付畀前妻,但1970年後,基於男女平等考量,男方亦有權向前妻要求贍養費。當然贍養費多少,同樣由雙方協議,同埋按收入能力,財政狀況去決定,大家好嚟好去講得掂數自然好,但講唔掂數就要搬上家事法庭,由法官去判。

最近阿Man從行家姊妹八到一單料,基金界有單離婚case,搞到上家事法庭之餘,仲要爆出男方係一個渣男。姊妹們仲話,當初女方以為嫁咗個金融才俊,一心做好老婆、好媽媽。誰知結緍冇兩年,男方已出軌,更反臉不認人,縱有千萬個唔願意,為咗自己同囡囡將來,亦要將單嘢訴諸家事法庭,攞番個公道。

據聞故事男主角係一間中外合資基金管理公司某投資組合經理,做得Portfolio Manager(PM),月入十萬八萬係等閒事,但男方竟然提出每個月只會向女方支付5000元贍養費。無錯係5000元,仲要係個女由女方照顧,唔要女亦唔要乸。

呢單八卦消息爆出後,令唔少知情者嘩然,阿Man更有唔少芬佬朋友聽到之後,覺得呢名渣男,映衰晒啲芬佬行家,出手之低,係去到離譜級數。

好老實,香港地物價高企,五千蚊兩母女,好似連基本膳食費都唔多夠,唔好講話要供書教學,絕對唔符合必需生活費呢個條件。當然有人話一家唔知一家事,兩個人搞到分開當中必有內情。

揀基金經理 品行也重要

不過事實係,男方喺提出離婚前,將夫婦聯名戶口所有存款提走,當時提款嘅藉口係阿媽有病,急需醫藥費作周轉。最令人氣結嘅,係男方今日提款,明日就去如黃鶴。一走了之只留低一句說話,覺得老婆唔愛自己,唯有離家出走。無論渣男係覺得老婆唔愛自己又好,男方另結新歡都好,遺下老婆同個女唔理,已經係唔負責任嘅表現。

阿Man喺金融圈見過唔少渣男拋妻棄子,但今次故事重點唔係嗰五千個大洋嘅所謂生活費,畀得出手確係難睇至極,出手咁低嘅渣男都算係極品。作為一個PM,保守估計月入十萬八萬係基本,更何況舊年渣男20個月花紅袋袋平安,收埋做私己錢呢筆,就喺呈交畀家事法庭嘅財務報告中披露,女主角知道當然晴天霹靂,仲要被渣男提走聯名戶口全部積蓄,更加不恥渣男嘅所作所為。

阿Man作為持牌人,成日要緊記KYC,即係know your client,了解客戶背景及風險承受能力,再為客戶提供合適服務。而作為客戶去挑選一個為自己管理財富嘅專業人士,同樣要識得KYM,know your manager,個人操守同品行都好重要。雖然人哋家事都唔理得咁多,個人行為亦未必會影響其投資表現,但渣男行為反映其個人係極度不負責任,識揀都咪揀人品唔好嘅人去為自己管理財富。

麥狄文(徐狄怡.證監會持牌人)

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads