市況堪虞 CDR胎死腹中

喺6月下旬，內地曾有媒體報道，一位接近內地監管機構嘅消息人士表示，內地實際上已暫緩發行CDR嘅事；加上上證指數喺3000點樓下，CDR發行重啟嘅可能性更低。按照消息人士爆料，內地要重啟CDR，須待內地股市做番好啲，上證指數至少要喺3200點至3500點之間穩定一段時間，CDR方有機會出台。

除咗內地市況疲弱，睇番政策準備又或者市場心理預期甚至整體投資大環境，目前都唔係推出CDR嘅理想時間，內地監管機構唔想孭鑊，對於CDR幾時登場，態度就傾向審慎。

中介亂陣腳阿里傳縮沙

爆料人士又話，監管機構對於CDR上市有兩個基本要求，第一係要盡量確保CDR上市後，一段時間都守住招股價唔破發；另一個條件係要保證專為CDR發行而產生嘅幾隻基金，喺3年封閉期內唔會出現虧損。

睇完呢兩個條件，阿Man幾乎可以肯定CDR短期會胎死腹中，皆因喺內地為咗應對貿易戰被美國額外徵收關稅，目前唯一可以做嘅，就係任由人民幣逐步貶值。喺人民幣持續貶值嘅大前提下，內地股市亦會持續低迷一段時間，至少喺估值方面，隨住人民幣貶值，亦難以起死回生。

內地監管機構對CDR發行打退堂鼓，唔少已籌備CDR項目嘅中介機構，因為呢個消息而陣腳大亂。聽聞一間早已獲得「BATJ」（即百度、阿里巴巴、騰訊（00700）跟京東四大科網巨企）相關CDR項目嘅券商，呢期有關呢方面嘅新消息再冇update，而專責部門小組亦冇晒動靜，短期內申請送出相關CDR材料嘅機會微乎其微。

小米（01810）成為首間喺香港上市嘅同股不同權公司後，本欲同步喺內地股市發行CDR，但畀中證監嘅萬言書兼80幾條問題搞到知難而退。剛剛夠晒資格發行CDR嘅阿里巴巴，則有傳聞指公司自己縮沙，考慮到種種原因，亦押後原本喺7月發行CDR嘅計劃。

雖然阿里方面回應指只要條件允許，阿里就回歸祖國，但如今就連肯定夠晒資格發行CDR嘅阿里，回歸計劃亦泡湯，令阿Man更加深信係阿爺未首肯CDR推出，多於公司未夠資格成事。

外圍不穩暫緩發行是好事

其實阿爺料事如神，本來如日中天嘅美國納指，踏入美國季度業績期後，喺Facebook帶頭崩盤嘅情況下，巨企股價相繼插水，新經濟股若然如期喺內地發行CDR，估值未見泡沫可能已先反艇。再者，內地股市表現不濟，在市場資金緊絀下，即使阿爺放水紓緩內銀嘅水緊慘況，亦未有任何資金流入股市，內地股市仍舊一潭死水。一旦CDR成功發行，將分流更大量資金，對內地股市只會雪上加霜。

不過阿Man認為，CDR暫緩發行未嘗唔係一件好事，反正美國科技股開始仆直，中國嘅新經濟企業及科網巨企，喺市場水緊之下，回歸亦難吸引北水流入，再多一批CDR上市，A股反而死快啲。中港兩地缸邊友，暫時難以寄望A股翻生，但願A股可以守穩現水平唔再大插，已經要劏雞還神。

麥狄文（徐狄怡．證監會持牌人）