熱門:

2018年5月23日

麥狄文 金融街密語

第一視頻大股東以大欺小

第一視頻(00082)日前開股東大會,竟然搞到報警咁大件事,原來係有股東想提問而畀人「凶」,覺得人身安全受威脅,決定報警求助。

彪形漢阻股東提問

本來股東出席股東會,就係為咗深度了解公司運作情況,股東發問係必然權利,當然無可厚非。惟日前第一視頻嘅股東會,有股東代表欲發問,都未開聲,已經被一名身形健碩嘅金毛大漢喝止,而據聞會場內另有十數個造型相近嘅大漢在場。股東代表質疑呢批彪形大漢並非第一視頻真正股東代表,因為未見呢批彪形大漢手持投票紙,既然冇投票紙,極有可能並非股東代表,咁究竟有乜資格出席股東會?加上呢批大漢阻撓股東發問,兼且惡形惡相,為顧及自身安全,最終報警求助。

好地地開股東會,唔知點解有班唔知邊度嚟嘅彪形大漢阻止股東提問,究竟係咩一回事?阿Man不妨跟大家回帶睇一睇。今次呢個股東會,主要係投票有關批准年報報告、董事酬金、委聘核數師、重選主席張力軍、獨立非執行董事王臨安等議案,獲逾60%股東贊成、逾39%反對而獲通過。上述呢堆議案並非戲肉,小股東真正關心嘅,係有關授權董事會配發20%額度股份,以及擴大授權董事配發及處置股份呢項動議。皆因呢一次批配,早於上星期二即本月15日,有股東向高院申請禁制令,禁止主席張力軍向11名承配人以先舊後新形式配售3.17億股股份。

配股疑為引入自己人

股東申請禁制令,原因係公司目前賬面上仍有超過4億元現金,仲有淨資產,理論上係冇迫切嘅融資需要。最奇怪係今次配股向11名承配人配售股份,但同時又透過股權獎勵計劃,喺市場買入股份贈予11名不知名人士。小股東認為配售動機有問題,股權獎勵計劃同樣黑箱作業。

最終法院未有頒出禁制令,而有關收購瘋狂體育旗下手遊業務嘅交易動議,由於特別股東大會無限期押後而變相取消交易。惟小股東一直反對嘅配股計劃,喺小股東一片反對聲音之下,仍在近57%股東投票贊成、逾43%股東反對下而夠票通過。小股東擔心呢次配股係主席張力軍作為關聯人士,未有任何相關交易嘅投票權,而匆匆喺股東會前提出配售,擺明係引入「自己人」支持關聯交易事項。雖然有關交易已變相取消,但配股完成,自己人已順利擺咗入公司,將來大股東任何交易都有機會為所欲為。

其實作為上市公司董事,理應以公司股東利益為大前提,而非利用管理層身份謀取自身利益。為咗方便自己「做嘢」,透過配股引入自己人以圖影響股東會投票結果,令上市公司股東會公平嘅投票制度變得蕩然無存。上市公司大股東以大欺小,榨取小股東利益嘅事一直存在,但監管機構似乎束手無策,投資者作為上市公司小股東,只能自求多福。

麥狄文(徐狄怡.證監會持牌人)

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads