2018年3月28日

麥狄文 金融街密語

騰訊唔會跟fb踩同一塊蕉皮

最近美國科網巨擘Facebook（fb）惹上大麻煩，股價從上月初193.09美元高位，一度跌至近日低位149.67美元，而一周計更急挫逾一成，跌幅相當驚人。原因是大數據分析公司劍橋分析（Cambridge Analytica），不法地向fb收集咗5000萬個用戶嘅個人數據，為特朗普在2016年美國總統大選提供數據採集、分析和戰略傳播，簡單嚟講，即係「操縱民意」；更有消息指劍橋分析通過向特定用戶投放政治廣告，影響英國脫歐等全球最大政治事件走勢。

呢次洩露客戶資料醜聞，唔單止拖低fb股價，公司CEO朱克伯格要公開道歉，更嚴重係不論fb主動洩露及濫用客戶數據與否，美國聯邦貿易委員會已就此展開調查。早於2011年，fb已曾就客戶私隱問題被委員會調查，當時雙方達成和解協議，未來再發生洩露用戶訊息事件，每一戶口將處以4萬美元罰款。今次受影響用戶高達5000萬戶，若被委員會裁定fb洩露訊息，罰款最高可達20000億美元，超過目前fb總市值一半。

一如fb、微信、淘寶等平台，均能透過用戶嘅點讚、留言或搜尋歷史等數據，推斷客戶的消費喜惡及習慣，然後再進行精準廣告投放及營銷。不過，劍橋分析更把炮嘅地方係，將呢一切大數據跟政治連繫，從中搵到商業模式。喺公投或競選過程中，劍橋分析透過大數據分析得出用戶性格模型，喺唔同政治活動當中搵出潛在投票者，並通過一系列消息傳送、廣告投放等，影響投票者決定。雖然暫時未能確定fb喺洩漏客戶資料方面有冇直接參與，但公司必須承擔相當大責任。

中央監控微信資訊

其實，早有美國學者Scott Galloway提出，fb遲早一日因為數據過度商業化而面對各種問題，作為全球最多用戶嘅社交平台，為咗換取最高商業價值，將會不擇手段，無所不用其極吸引大眾注意力，以增加其點擊率及瀏覽量。當中最恐怖嘅一點係，早於2014年fb已通過後台運行程式，打開用戶手機語音系統，監聽用戶所有通話內容，並利用人工智能系統，通過大數據對用戶進行分析，阿Man聽完都有啲擔心。

另一點係fb主要收入來源係廣告，而全球每日有數以億計嘅人登入fb以獲得資訊，若話呢間係全球最大媒體公司，比起將公司界定為高科技公司更貼切；不過作為媒體公司，將要承擔責任及義務。所以朱仔一直堅持公司係高科公司，除咗可享有高估值之外，亦唔需要負上任何道德責任。呢個原因亦令Facebook充斥住無數假消息、流新聞，為咗廣告收入，公司唔理會消息及新聞嘅真確性，總之瀏覽量高嘅就係好帖文。除咗咁，透過大數據分析客戶嘅價值觀、政治態度等，fb會向客戶推薦唔同嘅文章，而呢啲文章通常都較為出位或容易激發讀者情緒，更容易呃like或討嬲，重要係要引起關注，間接加速世界分裂同偏見。

或者大家會諗起，既然fb面對客戶私隱同大數據處理問題，咁股王騰訊（00700）旗下嘅微信平台，會否同樣面對類似問題。且慢，作為偉大祖國嘅最大社交平台，客戶資料外洩嘅事一定唔會發生，皆因阿爺一直對相關平台進行監察及控制，稍有阿爺睇唔過眼嘅假消息、流新聞，又或偏激言論，一定已經河蟹。喺阿爺嚴密監察之下，用戶相關資料除咗阿爺能掌握，根本無機會外洩，即係fb今日發生嘅慘劇，絕無可能發生嘅騰訊身上，騰訊唔會踩中同一塊蕉皮。難怪騰訊市值跑贏fb，聰明嘅投資者梗係識得揀。

麥狄文（徐狄怡．證監會持牌人）

 

放大圖片 / 顯示原圖

下一篇：	經濟基調仍佳 慢牛懶理貿戰
上一篇：	跑贏「神奇公式」的選股秘策