《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2018年3月7日
噚日截止認購嘅「天仁茗茶」代理商賓仕國際（01705），公開發售超額認購近2600倍，遠遠超過希瑪眼科（03309）1572倍超購，暫時為2018年IPO超購王。同時賓士國際暫時亦成為史上第二大超購王，拋離當年惠生國際（01340）嘅2187倍超購。
能夠成為超購王，共通點都係集資額唔大，發行股數唔多，又或者係有名牌股東或母公司撐腰，再唔係就係知名品牌。賓士國際個朵雖然唔算響，但旗下零售品牌「天仁茗茶」，由寶島紅到嚟香港，絕對係知名品牌。同時賓仕僅發售1億股，招股價介乎0.8元至1元，即係集資額最多1億元，同時符合集資額唔大同發行股數唔多兩大條件，成為超購王無難度。
再睇埋賓士嘅保薦人，正正係專幫本地知名品牌搞上市嘅LEGO力高，睇番LEGO之前亦保薦縱橫遊（08069）和高門集團（08412）。前者大家都知係專攻日本旅遊嘅知名本地旅行社；至於高門集團大家可能唔多認識，但一講到Volar，喜愛夜蒲一族、晚九朝五嘅蒲友，無可能唔知呢間明星級LKF蒲點。
過往LEGO做保薦人，通常都會搵其他行家做book runner（賬簿管理人），派飛交畀其他行家去搞。不過今次賓仕國際由LEGO自己一手包辦，拍住新華匯富（Sunwah Kingsway）做book runner，皆因LEGO要為其證券業務（俗稱1仔牌業務）省靚個招牌，所以呢一鋪一定做番場好戲。江湖亦有傳聞匯富嗰邊已放晒風，賓仕國際上市將有大龍鳳，必定成為最吸睛嘅新股之一。聞說LEGO今次咁落力省招牌，係今年除咗呢杯珍珠奶茶之外，仲有唔少本地品牌搵佢搞上市，打響頭炮梗要做得好好睇睇。
其實新股上市股價表現如何，未必一定同超額倍數掛鈎，反而book runner點樣派飛最為重要；當然天時、地利同人和，三者缺一不可。好似近日上市嘅新股，普遍都有唔錯表現，即使近日市況動盪，反而對新股更加有利。由於重磅股跟住指數大玩過山車，反而新股處於無障礙通道，只要book runner派飛有部署，上市後表現就有一定保障。阿Man收到風，賓仕國際今次已搵定一堆long fund入場，即係有部分貨源將落入坐定定嘅基金手上，令貨源更歸邊，雖然唔擔保上市後股價可以一飛沖天，但物以罕為貴，得嗰1億股IPO，貨源歸邊程度可想而知有幾勁。
麥狄文（徐狄怡．證監會持牌人）
訂戶登入
| 下一篇： | 兩會概念多 輪流炒不停 |
| 上一篇： | 跨境通：4年間成為世界級網購 |
