《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2018年2月7日
上星期阿Man先喺呢個專欄提到，虛擬貨幣炒作風險愈來愈高，咪以為係搵錢捷徑，學人炒埋一份。尤其係各國政府開始嚴打，加上自從期貨開始買賣之後，最熱門嘅虛擬貨幣比特幣，波幅愈嚟愈誇張。話口未完，比特幣幣值由上周三見報日嘅1萬美元水平，短短一周急瀉至不足7000美元，跌幅超過三成，都咪話唔嚇人。咁啱得咁橋，呢段時間美股亦開始走弱，道指喺6個交易日之內將去年初至今累積嘅6000點升幅蒸發咗一半，難怪有缸邊友認為美股崩盤，跟比特幣急挫有莫大關係。而有恐慌指數之稱、反映投資者情緒嘅VIX，周一收報37.32，急升115.6%，創紀錄以來最大單日升幅。
交收不合規 白撞居多
美股閃崩當然拖累全球股市表現，而港股自2月份開局以嚟連跌4日，恒指累插2291點（7%），幾乎將1月份全部升幅抹去。唔少缸邊友都擔心股災殺到，噚日港股就有超過九成股份下跌，跌勢相當全面。
不過阿Man反而唔係太擔心，即使美股已見頂，港股經過呢一輪調整之後，仍有條件再創新高，主要係港股現價估值仍處於合理甚至係相對便宜嘅水平。由於近日臨近農曆新年，北水掃貨或無咁積極，而下周三開始，「港股通」更因假期而暫停一星期，難免有大戶借頭借路嚟次大震倉；加上大市自去年12月開始回升至今，恒指足足升超過5300點，期間未有一次較大型調整，今次借歐美股市疲弱表現調整，後市發展可以更健康。
阿Man咁講唔係斷估，除咗港股估值仍合理，A股年中將被納入MSCI，基金點都要掃貨，加上下月業績期，只要重磅企業交到份靚靚成績表，下月港股又可以從新起步。尤其當歐美股市估值已相對港股較高，基金要開飯，自然資金有機會從歐美流入中港市場。講開基金搵食，呢期即使市況麻麻，阿Man竟然收到唔少自稱基金代理人，查問有冇股份可以折讓批股，而查問嘅股份仲係屬於「港股通」之中嘅中型企業，市值閒閒地幾百億。
有生意搵上門，阿Man當然樂於八一八，奇怪嘅係呢啲所謂基金代理人，做起嘢上嚟無規無矩，既無安排配售代理，搵持牌機構做placing agent，亦未有定價方案或者交收安排。一味追問有冇貨主有貨可折讓出售，並指配售佣金可觀，仲可以現金交收。
阿Man愈聽愈唔對路，向行家打探之下，發現唔少行家亦有收到相關查問，不過交收安排唔合法合規，大家都不了了之。最離譜係呢啲所謂代理，要求股份折讓高達兩成或以上，好老實講，有番咁上下晒士嘅上市公司，要批股集資都會依足法規做事，而折讓比率亦只有幾個巴仙，邊有咁大隻蛤乸隨街跳。
阿Man未知呢啲所謂基金代理人乜頭乜路，但以其行事手法，白撞居多，亦未知其居心何在，借此平台提醒各經紀行家，即使想促成交易賺取佣金，亦要緊記合法合規行事，對於呢類無厘頭查問，大可一笑置之。
麥狄文（徐狄怡．證監會持牌人）
訂戶登入
