熱門:

2017年12月27日

麥狄文 金融街密語

謎網50或助證監擴大權力

一年容易又過去,2017年係港股不平凡嘅一年,由年初至今港股錄得逾三成升幅,跑贏全球多個股市,當中更不乏倍升股。不過今年港股升勢僅傾向市值較大嘅龍頭股,細價股不僅乏善可陳,甚至在年中發生「粉塵爆炸」事件,多隻細價股一日之間市值蒸發五成以上,不少股份更喺幾個交易日之間市值蒸發九成。

「粉塵爆炸」事件源頭,係有「股壇長毛」之稱嘅Daivd Webb,曾發表「港股50隻不能沾手的股份」,及後稱為「謎之網絡50隻港股」(簡稱「謎網50」),當中公司不少被指股權過度集中,而呢堆公司又出現互控關係,總之關係千絲萬縷。目前證監會勒令停牌嘅「謎網50」股,包括康健醫療(03886)、新銳醫藥(06108)、華仁醫療(00648)及葉問第三代傳人冼國林任主席嘅第一信用(08215),同埋都持有呢幾隻DQ股重倉嘅康宏環球(01019)。

動用尚方寶劍DQ公司

康宏環球有前高層被ICAC拘捕,而當中核心人物,即係兩年前港股大時代細價股炒到甩轆後,開始被缸邊友所認識嘅殼股界紅人曹醫生,亦為調查目標人物之一,不過暫時ICAC未能聯絡上曹醫生,據聞其目前身處袋鼠國。今次事件被市場解讀為證監打大老虎,那麼誰是證監口中「邪惡集團」嘅最終Big Boss,阿Man又唔多肯定,而康宏事件亦已進入司法程序,更加不便多言。

值得留意係,今次被證監會DQ嘅幾間公司,都係涉及證券及期貨條例第8(1)條,即係當監管機構覺得有上市公司的文件涉及虛假、誤導,又或基於保障投資者利益的理由,可以勒令該上市公司停牌。過往證監會引用有關條文勒令停牌嘅公司,大多壽終正寢,難以再復牌。所以呢條8(1)一向被市場形容為「尚方寶劍」,寶劍出鞘通常都係見血收場。

另一點係證監會今次高調出手,更喺公開場合表示當局已留意到多個由公司網絡構成的「邪惡集團」(Nefarious Groups)近年冒起,利用監管制度嘅盲點操控市場、欺騙投資者,涉及損失係數以十億元計算。證監會更表示動員了三個部門(中介機構部、企業融資部、法規執行部)過百人進行調查,係有史以嚟最大規模調查行動。嗰次公開發言,被視為向細價股莊家宣戰,一場細價股監管風暴,只係啱啱開始。

其實今次「謎網50」事件,亦突顯細價股市場一系列問題,包括新股「啤殼」、配售股份時莊家「圍飛作歹」、股權過度集中等等。港交所(00388)一直掌管前線監管權力,但同時又係新股上市、配股活動嘅受惠者,被質疑角色矛盾,難以「扚起心肝」嚴肅監管證券市場上嘅亂象。

舊年證監會同港交所,曾就聯合進行上市監管架構改革諮詢,改革重點係加強證監嘅前線監管權力,不過由於呢項改革會令上市申請難度大增,證券業界群起反對,同時質疑證監會擴大權力干預自由市場,結果喺一片反對聲之中,有關改革亦宣告流產。今次「謎網50」一事,令證監有機會主動出擊,利用尚方寶劍DQ問題公司,唔排除再次掀動港交所跟證監會之間嘅角力。

麥狄文(徐狄怡.證監會持牌人)

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads