熱門:

2017年9月13日

麥狄文 金融街密語

夜期盡快加入期權交易

唔經唔覺夜期交易已經行咗超過4年,記得當年雖然魚缸管理員都做晒諮詢,但喺一片反對聲音之下,夜期最終都喺2013年4月開始實施,交易時段由每日下午5時至晚上11時。及後港股加插咗收市後交易時段,夜期則順延至每日下午5時15分至晚上11時45分。

夜期實行之初咁多反對聲音,主要係嚟自中小型經紀行,因為人手問題,同時涉及經營成本,無啦啦要搞夜班輪班制,皮費重咗就梗係啦。對於大行嚟講反而問題不大,事關大行有做開環球市場,即使要開埋夜期交易,只係人手調配,唔需要額外增加成本。

2013年實施夜期時段之後,最初業界視為雷聲大雨點小,投資者參與度唔高,對實際作業用途唔大。魚缸管理員設立夜期,原意為提供跟歐、美股巿接軌嘅交易平台,令投資者可以對沖外圍風險。

但係,夜期即使至今亦不過延至晚上11時45分收市,根本未能覆蓋整個美股交易時間,期指夜期收市價亦往往較翌日日間期指開市價存在巨大差異,令投資者不但唔能夠作對沖之用,反而經常畀大戶屈機。

運作上軌道 加時反對聲大減

不過,不滿歸不滿,夜期交易量喺呢幾年間又確係一路咁上,雖然增長速度同數量差強人意,但炒家已開始熟習夜期操作,甚至利用大戶屈機舞高弄低夜期之際,把握機會短炒搵食。

上月初魚缸管理員已完成夜期加時諮詢,由於交易量有所增長,建議完善夜期機制,延長夜期交易時段至凌晨1點,將會喺11月初正式開始。第二階段則進一步延長交易時段至凌晨3時,並建議加入交投最活躍嘅4種股票指數期權合約,包括恒指期權、H股指數期權、小型恒指期權及小型H股指數期權,最快明年初實行。

今次對於夜期再加時,諮詢期間冇乜聽到反對聲音,但老實講句,上次反對聲音嘈到拆天,魚缸管理員都充耳不聞,幾年前由無奈接受,到與之共存並適應,今次再加時,反對聲音自然較少。事關夜期已運作多年,券商早已安排人手負責有關交易,即使最終延長至凌晨3時,亦唔需要額外增派人手,應該唔會點樣增加營運成本。

反而阿Man認為今次魚缸管理員應該一不做、 二不休,唔需要分階段實施,一嘢就將夜期加時至凌晨3時,實行令港期可以盡量覆蓋花旗股市交易時間。

除咗加時之外,唔少期權炒家認為應盡快加入指數期權產品交易,皆因期權一向冇夜期交易,變相少咗大半日時間,無啦啦耗損咗大半日時間值,對期權投資者唔多公平,又係感覺相當屈機。尤其近年愈嚟愈多投資者開始買賣期權,要真正改善夜期機制,盡快加入期權交易,方為上策。

不過,魚缸管理員為夜期加時,同時要注意夜期交易系統嘅穩定性同安全性,尤其係加入埋指數期權交易,目前系統能否應付自如,需要事先測試好。免得今年2月發生嘅夜期離奇超時交易4分鐘,雖然只係短短幾分鐘,但有人乘機玩嘢,一分鐘足以擾亂市場,後果可以相當嚴重。

麥狄文(徐狄怡.證監會持牌人)

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads