《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2017年1月11日
自「侵侵」當選花旗總統之後，隻Yen好似食咗瀉藥一樣，對於好似阿Man呢啲「日本控」當然係天大喜訊，皆因今年遊日又慳番唔少，甚至可以放肆些少，買多幾件衫同兩對鞋。以日本旅遊為主打嘅縱橫遊（08069）亦把握機會申請上市，明天正式掛牌創業板。
縱橫遊上市本來冇乜特別，公司仲要喺招股書裏頭發定盈警，指舊年上半年因為日圓持續升值及熊本地震，令遊日需求受影響，當地「地接成本」（例如酒店收費、交通成本、餐費及門票成本）增加，公司2016年4月和5月兩個月的收益及毛利率按年均顯著下跌。不過，此一時，彼一時，日圓走勢喺去年底大逆轉，而且隻Yen持續疲弱，今年應該可以扭轉劣勢。
唔講唔知，原來縱橫遊成立於1979年，準備邁向40周年，喺香港歷史悠久，而且品牌屬家喻戶曉嘅旅行代理商。縱橫遊呢個品牌近年同東瀛遊（06882）同被視為日本旅遊專家，隻Yen有乜變動，都對呢兩間旅行社有一定影響。雖然近年旅遊業競爭激烈，但係好彩有內地豪客支持，旅遊業得以捱過一關又一關。
阿Man所指嘅內地豪客，唔單止係豪玩豪使嘅內地遊客，而係指真金白銀入股本地旅行代理嘅「北水」。聽講目前多間本港旅行代理，包括永安、新華同埋康泰等等，呢兩年已先後引入唔同嘅內地大孖沙，好似海航、携程等做股東。有內地金主呢條大水喉，生意自然可以愈做愈大。
明日登場嘅縱橫遊，傳聞晨早搵到內地大孖沙入飛，中間穿針引線嘅，當然係幫公司搞上市嘅一班精英，當中不得不提縱橫遊今次嘅獨家賬簿管理人同埋獨家牽頭人鴻鵬資本。鴻鵬亦唔係小兒科，公司去年被英裘控股（01468）旗下公司收購八成股權，可以話係半間上市公司，實力毫無疑問；公司過去亦擔任過唔少上市公司嘅賬簿管理人，又或者係牽頭人甚或協調人，公司喺新股上市經驗絕對唔少。
當年御藥堂（00932）上市，公司同樣係先上創仔，再轉去主板，而鴻鵬當時已獨具慧眼，喺御藥堂上市時擔任賬簿管理人。講番近期些少嘅代表作，仲有百本醫護（08216）同星星地產（01560），前者聽聞夠晒秤，隨時準備申請轉去主板，鴻鵬同樣早着先鞭，成為其獨家賬簿管理人；至於星星地產仲厲害，係舊年上市「超購王」之一。
縱橫遊未上市已泊到個大碼頭，唔排除上市後生意愈做愈好，尤其今年日圓疲弱，肯定遊日業務可以扭轉舊年弱勢，要轉主板指日可待。
麥狄文（徐狄怡．證監會持牌人）
訂戶登入
| 下一篇： | 新興市場良莠不齊 選股為關鍵 |
| 上一篇： | 3新股全報捷 貨源極度歸邊 |
