《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2016年12月21日
今期冇乜八卦嘢好講，不如同大家一齊掘金，講嘅係上市僅僅四個交易日嘅美圖（01357）。阿Man敢大膽預言，美圖極有可能係騰訊（00700）翻版，講緊嘅係以未來十年嚟計，美圖投資價值同投資回報，極有可能係以百倍計算。
先睇番美圖究竟搞緊乜，公司喺本月15日正式掛牌主板上市，上市四個交易日遇上港股四連跌，認真唔好彩，股價昨天收報8.07元，較招股價8.5元低。公司定價8.5元發行5.47億股，集資額僅46.88億元，IPO僅錄得超額認講1.39倍，缸邊友對美圖有幾大興趣，大家睇得到。其中京基實業已認購1.09億股，係主要股東之一。
美圖上市儀式當日，正好完美示範美圖如何喺超過13億人口嘅中國市場上發展其事業版圖，為打造成為另一個騰訊王國而鋪路。一般上市公司習慣用掌聲歡呼聲嚟慶祝上市，但喺美圖上市當日，嘉賓更喜歡通過直播傳達現場氣氛，通過手機攝像頭跟互聯網另一端嘅觀眾們親切問好、分享心情。
數億流量開展商業化
而喺每一句問候、每一幅相片同每一個直播片段之中，美圖嘅數據庫中正產生源源不斷嘅數據，每一個影像經過脫敏處理後，都毫不浪費落入了美圖數據運算之中。「智能設備的攝像頭就是人工智能嘅眼睛。」美圖已經佔領咗呢個流量入口，呢個亦係未來美圖成為另一隻騰訊嘅關鍵。
坐擁數億流量，美圖完成上市後，將開展商業化，明年底實現互聯網增值服務及其他分部或會收支平衡。美圖2017年上半年會推出電商平台，超過200多個品牌將會跟美圖合作，接住之後三五七年，冇錯係三五七年，電商將會係美圖最重要變現方式。事關今年6月開始嘗試收費美拍直播，已經實現高倍嘅收入增長。
好老實，十幾年前又有邊個諗過內地BAT──百度、阿里巴巴同埋騰訊，會成為全球國際知名嘅互聯網科技公司。當年騰訊喺港交所登陸上市，相信連馬化騰自己都冇諗過，曾幾何時佢有意以50萬人仔出賣嘅騰訊，喺上市十年多啲時間，會成為過萬億元公司。當時只有QQ呢個即時通訊網上平台嘅騰訊，冇諗過網遊可以咁賺錢，當然亦冇諗過可以互聯網開展金融業務，互聯網公司係永遠喺探索中尋找到方向。
當年一般時下年輕人，包括阿Man在內，仍只係着重或者習慣使用ICQ跟MSN等外國通訊平台，眼內壓根兒睇唔起QQ。QQ後嚟取勝嘅地方係，佢有十幾億人口嘅國家作為龐大後盾，到後來ICQ式微，MSN被Facebook或IG甚至後來嘅WhatsApp同埋Line等社交或通訊平台取代，QQ仍能順利過渡至微信，成為內地最普及嘅社交及即時通訊平台。或者讀者可能覺得阿Man講緊十年後嘅預測，未免有啲風水佬呃你十年八年嘅感覺，你哋可以選擇唔相信，反正我信了！
麥狄文（徐狄怡．證監會持牌人）
訂戶登入
