《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2016年11月9日
牛牛證券（下稱牛牛）成立不過三幾年，在2014及2015年期間獲得「企鵝網」、「一碌紅木基金」，「矩形創投」等支持，由首輪至次輪一共獲得共7000萬美元融資，發展其互聯網金融業務。「牛牛證券」早喺2012年10月已經攞咗港股券商牌照，亦成為香港交易所的参與者。
不過牛牛業務發展重點為互聯網證券交易，本來公司創辦人就係金融圈外人，由IT人搞證券公司，針對嘅客戶群係廣大網民。客戶只要下載番個牛牛APP，自然可以一機炒遍天下魚缸，由投資入內地股市以至華爾街，一隻手指可操控自如。
為咗配合今年稍後啟動嘅「深港通」，牛牛早喺舊年底開始，喺網上高調招攬過千個內地開戶見證人，吸內地客炒港股。牛牛仲開發咗一款專門用作遠程見證、驗證嘅APP「見證寶」。內地投資者只需打開手機或網頁，通過地圖搵到距離最近嘅見證人，再通過視頻驗證，即可完成見證環節，強調「唔需要遠赴香港開戶」。
最離譜係呢批所謂見證人，其見證人身份資格跟本港法規有一段距離。根據香港證監會規定，客戶開戶過程，必須由持牌人士或券商職員，又或者太平紳士或專業公證人現場見證，但牛牛嘅內地見證點，大部分設喺影印舖，見證人就係嗰間舖舖主，是否違規，讀者心裏有數。
牛牛喺過去3年間，以每年5倍嘅增速擴大，用戶數已經超過50萬，為咗吸客更派現金券，招客手法實在係踩鋼線。能躋身香港券商頭3名，咁短時間內迅速崛起，當然有行家眼紅；加上有傳媒披露事件，監管當局自然要關注一下事件。
奇怪係證監對於牛牛未作任何行動，回應查詢時更加拒絕評論「個別事件」。過往曾有中港兩地設分行嘅券商，喺處理內地客戶賬戶時，被指內部監控不足被罰。「豐豐」同「嘉樂仔」，都現兜兜罰咗七位數字，原因係未有合規身份驗證嘅開戶程序，極有可能淪「人頭戶口」溫床，增加造市危機，證監會打擊當然唔手軟。
雙重標準屢見不鮮
不過今次監管機構對牛牛坐視不理，直情係睇佢唔到咁款。港交所（00388）更加同牛牛大玩crossover，聯同「企鵝網」一齊搞咗個「港股模擬大賽」，仲話係「誠意尋找港股之神」喎！呢個比賽嘅目標係為內地投資者嘗試投資港股，等佢哋熟悉香港市場規則，明晒，講到尾就係為「深港通」操練兼宣傳。
聽聞今次成班本地卜架嬲到震，無論證監會抑或港交所，以前就偏幫外資偏到出晒面，到今時今日就為北水大開綠燈，當班本地卜架冇到。阿Man對於監管機構嘅偏心、雙重標準嘅作風見怪不怪，鬼叫人哋贏在起跑線，有外資背景固然好，今時今日想做大做強，唔搵個內地拍檔真係冇得搞。
麥狄文（徐狄怡．證監會持牌人）
訂戶登入
| 下一篇： | 買樓只餘下自用價值 |
| 上一篇： | 今天升上23120轉穩 |
