《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2016年10月5日
香港旅遊業情況慘淡，當然冇人會開心，不過阿Man估計喺今年3月從花旗國迪士尼空降香港迪士尼嘅CEO劉永基，應該係笑得出嗰個。皆因今年佢大哥上任第一個重任，就係向員工開刀派大信封，呢次裁員引起風波，更惹嚟議員乘機介入，希望政府呢個大股東叫停裁員。
新CEO裁員趕退本土派
雖然迪士尼一再強調裁員唔會波及前線員工，主要牽涉副經理級以上資深行政人員，但亦有唔少中層員工，甚至有超過10年嘅「開園元老」中招。最奇怪係呢頭搞裁員，嗰頭又話當新度假酒店落成，會增聘人手，所以嗰一次裁員並唔係單純因為成績表見紅，要減輕財政壓力，更似是新CEO洗太平地，花旗派趕退本土派。
唔少員工認為花旗迪士尼有過橋抽板嘅味道，樂園開幕初期蝕到瞓街，係因為老外CEO跟本地旅遊業界、傳媒關係惡劣，宣傳效果唔理想。直至2008年搵咗金民豪掌舵，成為首位華人CEO，喺兩年間令盤數EBITDA扭虧為盈，2012年開始更賺足3年。不過舊年內地旅客數字急跌，樂園又再蝕錢，迪士尼乘機換血，向金民豪開刀。話就話金民豪以個人理由請辭，但坊間當正係「被請辭」，因據聞金民豪上午獲通知被辭職，中午就連門口都入唔到，其他本土派高層亦「禮遇」相若。
迪士尼做嘢嘅人少咗，話就話裁員未有波及前線員工，即係要炒都唔會炒米奇同唐老鴨，對樂園前線運作應該冇影響。結果係點呢，裁員至今剛好半年，阿Man老友因為囝囝關係，係樂園年票常客，佢就話呢半年，樂園變得愈來愈唔歡樂，咁做落去只有趕客。
雖然米奇、米妮同其他卡通人物仲喺度，不過人手少咗，自然做嘅嘢就多咗，好似樂園內每隔幾多米就要有員工負責，呢個範圍擴大咗接近成倍，走都走到氣咳，仲邊有氣力掛住個笑容招呼遊客。加上接近年底，唔少員工擔心裁員第二波殺到，唔知幾時會收大信封，個個人心惶惶，仲邊度有「人人常歡笑」呢支歌仔唱。
記得迪士尼樂園創辦目的，就係要為樂園遊客製造夢幻歡樂氣氛，記得阿Man首次去香港迪士尼樂園時，有小朋友捉住米奇問，點解米奇一邊可以出現喺夢幻樂園企定定同粉絲影相，一邊又可以出現美國大街四圍行，米奇身邊嘅樂園大使笑笑口答咗句：「It’s magic!」家陣樂園蝕錢裁員唔夠人手，仲邊有本錢製造magic！樂園員工唔夠歡樂，仲有乜本事帶畀樂園遊客歡樂呢！前線員工苦口苦面，咁嘅形勢更趕客，樂園盤數更唔樂觀，惡性循環下，再加埋上海迪士尼加入競爭，阿Man真係擔心香港迪士尼點樣撐落去。
訂戶登入
| 下一篇： | 董事長說了不算 行長說了才算 |
| 上一篇： | 港股表面風光 |
