勿讓掘礦機事件窒礙區塊鏈發展

一般人講起區塊鏈（Blockchain）技術，不期然會同加密貨幣（cyptocurrency）連埋一齊，其實兩者表面上睇嚟係相互共存，但事實上區塊鏈係獨立於加密貨幣之外嘅一項去中心化資訊儲存工具，更被視為二十一世紀最具顛覆性嘅發明之一。

對於區塊鏈嘅本質同應用，喺網上有詳細及豐富嘅相關資訊畀大家查閱，阿Man就唔再浪費篇幅去解釋。

反而阿Man想講嘅係，比特幣（Bitcoin）呢隻被公認為交投最活躍嘅加密貨幣，喺2017年成為金融界最火熱嘅投資產品，一年間幣值被瘋狂炒高1300%，但今年風光不再，幣值由接近20000美元高位回落至不足4000美元，幣值較高峰僅餘五分一，除咗係因為市場避險情緒升溫，資金由高風險投資工具撤走之外，有不法之徒利用群眾對加密貨幣及區塊鏈一知半解，以及人性貪婪想搵快錢嘅弱點，以出售加密貨幣掘礦機搵水魚落搭，歛取巨額資金，就有可能窒礙區塊鏈技術喺香港嘅發展。

發行不同加密貨幣斂財

所謂掘礦其實係透過電腦運算程式，以獲取加密貨幣嘅一種勘探方式，由於運作原理跟開採礦物相似，所以被稱為掘礦。但隨着資料塊產生速度加快，掘礦難度亦提高，而相對於較遲加入掘礦嘅礦工，亦較難掘到較受歡迎或認受性較高嘅比特幣。正因為呢個原因，有「醒目仔」開始發行各式各樣嘅加密貨幣，以及相關掘礦機，更表示新發行加密貨幣較易掘，而貴價掘礦機則以較快運算速度掘礦，為機主爭取最大回報。

最近最出位嘅掘礦機賣家莫過於較早前喺某區派錢而被捕嘅後生仔，呢一名九十後青年曾被三色台嘅節目訪問，其間態度囂張跋扈，展示其投資加密貨幣嘅戰利品獨立屋豪宅及超級跑車，惹嚟網民起底，結果被踢爆過往曾經同人合作，成立賭波賭馬貼士收費群組，家陣轉戰加密貨幣市場，只係另一個利用人性人貪婪嘅「搵銀事業」。

除咗有網民踢爆其手法低莊，當中疑點重重，錯漏百出之外，更有網民踢爆呢位後生仔只不過係「茄喱啡」一名，幕後有操盤手，呢個九十後不過係一個人頭咁大把。

當局有必要加強監管

其實有關加密貨幣嘅搵笨例子，又豈止一個咁少，單係比特幣呢種最受歡迎嘅加密貨幣，連最初嘅始創人都已沽清撤退，cap水意味已甚濃。但若然一般人對加密貨幣被用作歛財工具，因而忌諱區塊鏈技術喺香港嘅運用及發展，咁就多得呢班大帝唔少。

加密貨幣只係區塊鏈顛覆生活嘅一小部分，未來區塊鏈嘅運用範圍將無所不在地出現喺我們嘅生活中，目前熟知嘅加密貨幣只係揭開呢場二十一世紀資訊革命嘅序幕。

要減少呢類事件發生，講嚟講去又係監管問題，希望有關當局規管一下呢類先進科技投資產品，總好過香港喺呢方面發展又落後於人。

麥狄文（徐狄怡．證監會持牌人）