《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2018年12月3日
中美元首喺G20峰會嘅晚餐，係呢幾日全球焦點，結果係雙方達成初步協議，同意明年元旦起，唔再擴大加徵關稅，並繼續談判，爭取喺90日內達成協議。若最終能夠達成協議，撤銷所有關稅梗係皆大歡喜，相反喺90日後，中美雙方仍未能達成協議，美國將向2000億美元中國進口商品關稅增至25%，甚至對餘下2670億美元中國進口商品額外徵收關稅。
中美雙方暫時停火談判，無疑係好消息，但對香港唔少廠商嚟講，貿易戰一日唔正式結束，仍然係一個危機。睇番今年香港經濟，已被開打超過半年嘅中美貿易戰所折磨，最直接反映經濟領先指標的股市，就由今年初高位33000點水平，連跌多個月至10月低見24585點，自高位回調逾兩成，已陷入技術性熊市。正正因為港股嘅大幅回調，加上人民幣一再貶值，市場人士當然相繼睇淡，唔少好友變淡友，一直係淡友嘅就變得更淡，較早前更見有剛冒起嘅專欄作家誇下海口，表示恒指要直插至四位數，樓價要大跌七八成咁話。
老實講，個幾月前，中美雙方關係幾乎陷入冷戰，貿易戰僵局一直未能解決，確實令人擔憂夾喺中美之間嘅香港，會被呢場貿易戰折磨得體無完膚，對香港前景睇得淡啲亦好正常。不過，喺毫無數據支持下，胡亂猜測恒指要跌穿萬關，樓價要大插七成，似乎過咗火位。發表如此悲觀言論嘅作家，更非金融圈內人，自稱DR.皆因係退休牙醫一名，而本身算係一個資深投資者，有多年投資債券市場嘅經驗。
睇番呢位「作家」嘅觀點，真係唔識畀佢嚇死，識嘅就畀佢笑死。以目前港股PE已跌至10倍邊緣，而過往多次經歷如1997年亞洲金融風暴，又或者2008年環球金融海嘯，港股最低迷時PE最低亦不過係8至9倍，以現時恒指嚟計，亦即約20000點，若要跌至四位數，港股PE得番幾多倍，大家心中有數。
零售增長近一成
其實，想知香港經濟係咪會差到咁，倒不如多啲觀察實際情況。最直接先睇睇零售業，根據零售管理協會數據分析，香港下半年零售業增長或有放緩，但全年仍錄得近一成增長。雖然中美貿易戰影響或於明年初浮現，但只要中美雙方能和氣收場，預期相關影響輕微，甚至一閃而過，乜事都無發生過一樣。
至於間唔中見到有零售實體店做唔住，拖欠租金被業主入稟追債，好似上月就見過一家連鎖唱片店被指欠租，被業主港鐵（00066）要求法庭頒令歸還款項。呢類新聞表面睇係反映香港經濟確有暗湧，但查實唔少零售業早已轉戰網上，由實體店改為網店經營，故此香港零售業未至於差到貼地。
再講唱片店被追欠租之餘，同時有傳聞該公司老闆旗下公司拖欠員工薪金，講到老闆有幾咁唔掂，水緊之際更被證券行追孖展，但都只係道聽途說，傳聞一則而已。
以阿Man了解，該老闆個人經濟狀況絕無問題，尤其係佢旗下物業多過樹葉，身家閒閒地以十億元計算，區區百幾萬元欠租和欠薪，對佢嚟講只係碎銀。唔排除有人借貿易戰拖累香港經濟做藉口，收埋個銀包拖住唔找數，如今貿易戰有望雨過天青，估計想再扮窮、有錢唔找數呢條橋未必行得通。
麥狄文（徐狄怡．證監會持牌人）
訂戶登入
| 下一篇： | 「滬港通」及「深港通」上周收市統計 |
| 上一篇： | 貿易戰暫休 A股可望轉勢 |
