《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2018年10月29日
細價股近呢年幾以來，可以話是非不絕，舊年股壇長毛發表咗「謎網50」之後，相關上市公司嘅是是非非好似長篇連續劇咁上演。近期長毛又發表咗新「謎網26+3」，今次新謎網股更涉及唔少中型公司，望完個心都離一離。不過相對「謎網26+3」，似乎花生友更鍾意剝「謎網50」嘅花生，而且傳聞仲愈傳愈離譜，已經超越咗一般食花生嘅程度，搞到阿Man都忍唔住要出句聲。
近日市場有關「謎網50」嘅故仔，除咗係大夫喺上個月中秋節時，回港人月兩團圓之餘，仲去咗雪糕Cafe飲咖啡之外，花生友最關注嘅，就係有關詠春大師同街市大王之間嘅關係。
市場對於詠春大師話告又唔告街市大王諸多揣測，最誇張當然係有關詠春大師嘅健康問題，竟然亦畀花生友落重花生油，當中更涉及唔少離譜到唔多合邏輯嘅傳聞，阿Man聽到耳仔都側埋，更覺散播傳聞者，已經唔再係花生友，直情係造謠者咁款，去到有啲惟恐天下不亂嘅程度。
話說詠春大師因為眼疾關係，喺8月份參加「殼后」於人參國舉行嘅登陸生日派對期間，不幸受細菌感染左眼，需要切除。其後細菌更蔓延至身體其他部分，搞到要提早結束行程回港，其後竟有傳聞指詠春大師要提早返香港，係因為期間畀人「搞」，更被打跛腳，焗住回港診治。
當時出席派對嘅人物，部分係涉及詠春大師之前告上法庭嘅涉案人，令個別花生友無限聯想，竟然亂派花生油，指詠春大師畀人搞。由於傳聞愈傳愈離譜，詠春大師其後特意發公開信，解釋有關人參國之旅身體出毛病，跟任何人都無關係，純粹係細菌感染，希望唔好引起不必要誤會及揣測。
注意潛規則 忌加鹽加醋
查實據阿Man了解，當日詠春大師喺人參國參加「殼后」嘅派對時，到埗後健康情況確係一日差過一日，而需要提早結束旅程返港診治，而並非外界傳聞畀人搞盲隻眼兼被打跛腳。
其實只要用正常邏輯分析，有份出席派對嘅各路英雄，即使之間有任何恩怨，又或者涉及千絲萬縷嘅關係都好，畀面參加「殼后」派對，當然要尊重主人家，又點會喺派對期間搞寸個party。加上派對舉行地點仲要唔喺香港，就算有乜嘢事，要計數都返香港慢慢計。所以有傳聞話詠春大師嘅身體出毛病係「人為」，呢個說法未免有點過火。
其實食花生係人之常情，但刻意造謠似乎對傳聞中各人都唔多公平，尤其傳聞中各人當時更涉及法律訴訟事宜，作為花生友更加應該講少兩句。即使做花生友亦要注意潛規則，八卦還八卦，加鹽加醋，火上加油，係做花生友大忌。
麥狄文（徐狄怡．證監會持牌人）
訂戶登入
| 下一篇： | 電競運動商業價值與日俱增 |
| 上一篇： | 新股保薦人騙老闆伎倆 |
