《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2018年9月17日
跟大家闊別兩星期，阿Man嘅「金融街密語」經版面調動後，以後會喺逢星期一同大家繼續爆料，八盡金融圈內事。
既然要八卦，今個星期就同大家update一下謎網50風暴主角大夫嘅近況。眾所周知，上月中謎網50嘅風眼股康宏環球（01019），宣布由於大夫已連續6個月喺董事會冇咗影，公司按組織章程細則撤銷大夫職務，8月17日起生效。其實大夫被掟出董事局，都係意料中事，相信冇乜邊個會覺得奇怪。反而唔少人好奇嘅係，喺呢一年時間，究竟大夫身處何方，搞緊邊科？
當去年謎網50爆煲後，康宏即捲入連串醜聞中，「正奸會」、「雪糕佬」都打鑼搵大夫呢個核心人物，偏偏呢位大哥就音信全無，皆因爆煲之初，有傳大夫已一走了之，匆匆避走袋鼠國。不過，有關康宏4名前高層因涉貪污而被「雪糕佬」喺去年底拘捕，4人已經獲准保釋候查，而「雪糕佬」又一直未能成功聯絡到大夫呢個關鍵人物，以致「雪糕佬」跟「正奸會」嘅首次聯合行動，調查遲遲未有進展。
由於一日涉案人物未定罪，即使袋鼠國跟香港之間有引渡條例，都唔會適用，不過，聽聞大夫喺去年遠走袋鼠國後，唔夠兩個月，已嗱嗱聲由袋鼠國轉飛佛國，始㚵佛國跟香港之間並無引渡條例。其實明眼人都知道，謎網50嘅最終big boss並唔係大夫，至於邊個係終極話事人，阿Man唔講大家亦心中有數。
戶口被凍 彈藥有限
話說出事之後，大夫唔單止欠落不少街數，而有關證券行嘅蘇州屎，已經由終極big boss搵專人善後搞掂，加上多個跟大夫曾friend個打band嘅金融圈人，已清清楚楚跟大夫劃清界線，仲要有個疑似大夫嘅接班人出現。唔少缸邊友都認為呢單謎網50爆煲事件，監管機構將繼續迷茫落去，調查亦因為大夫玩失蹤而自動斷線，只要再過多三五七個月，呢個case最終都會不了了之。
不過，最近阿Man又八到大夫有意回港，返香港搵「雪糕佬」傾吓偈，總好過成世人留喺佛國飄泊。大夫有咁嘅諗法，主要係出事之後其名下戶口全被凍結，一年前避走時，只帶了數量有限嘅彈藥傍身，一年過去即使佛國生活指數唔算高，但一向要住得舒適，又要食得招積嘅大夫，都捉襟見肘。至慘係連喺科技園附近嘅富貴屋，據聞亦因為斷供而被銀行沒收，面對咁嘅慘況，大夫寧願盡地一煲，返香港博一鋪，攬炒都好過要屋企人捱苦。
大夫有意回港，但big boss同有關幕後玩家，又點會想呢件事發生，聽聞已經好好安頓其家人去咗袋鼠國，同時派人去咗佛國好好伺候大夫，惟恐招呼不周，大夫一個唔高興回流香港，咁就真係有排搞。
麥狄文（徐狄怡．證監會持牌人）
訂戶登入
| 下一篇： | 投資者難在新股市場賺錢 |
| 上一篇： | 華融靠兩招「化解」壞賬 |
