熱門:

2018年8月8日

麥狄文 金融街密語

慎墮炒股「邪教」群組

自去年股市牛氣沖天,坊間湧現唔少收費嘅股票班、投資講座,更衍生出唔少即市策略收費群組,於每日開市期間利用社交平台或手機Apps提供即市操作策略,收費平至幾百蚊一個月有交易,又或以千位數計嘅月費,最誇張係要先付六位數字代價出席講座,先有資格被「欽點」加入收費群組。

目前監管存灰色地帶

阿Man從未參加過呢類乜班乜組,當然唔知教班嘅導師或收費群組內嘅「領航員」究竟喺投資路上對參加者有何幫助,成績如何亦不過從宣傳上睇到嘅片面之詞,所以唔作有關呢類收費服務成效嘅評論。

不過之前阿Man都有提及,有過氣專欄作家以高昂收費開講座及即市策略收費群組,更誘使部分組員開倉操作,結果唔少參加者本金泡湯,如夢初醒發現貨不對辦甚至被搵笨,走去向證監投訴。

投訴者指有人未領有所需牌照或註冊,而喺香港進行受規管活動。主事人究竟有冇干犯相關罪行,當然要由證監去查得一清二楚,不過嗰位仁兄若然收費提供證券交易或期貨合約交易意見,按目前法例,應該有需要領有證監會第四類及第五類受規管活動牌照,即就證券及期貨合約提供意見。

不過聽聞涉案仁兄辯稱相關活動只屬教學性質,仲明言一定過到骨,即係呢啲條例仍存灰色地帶,難怪咁多質素參差嘅投資班、講座及收費群組充斥市場,唔少騙徒老千成功靠此呃飯食。

稱得上騙徒或老千,當然有一套呃飯食手法,當中嘅共通點都係群組樓主將自己打造為專家神人,往往仲自稱有一套獨門秘笈,不入群組者不得知曉其操作。騙徒通常好識捉心理,向群組內成員洗腦,令組員只信奉樓主嘅獨門秘笈,說穿了其實只係一啲普遍常用嘅技術指標,再巧立名目包裝變成自創系統。群組成員對樓主講嘅每一句說話不作任何過濾分析,盲目追隨。首先樓主要令組員產生歸屬感,並自動自覺每月、每季、每年續會課金,樓主除咗會向組員噓寒問暖之外,更會跟組員打成一片,無所不談。問題就出咗喺呢度,一個群組既然係為提供即市投資策略而產生,樓主跟組員其他對話(多半係廢話),根本對增加投資知識毫無幫助,只係浪費時間呃水吹。

樓主獨尊排除異見

另一個特點係樓主通常唔會接受任何相反意見,永遠擺出一副唯我獨尊嘅態度,一言堂不在話下,遇到相反意見或留言指出其誤,刪除同封鎖就係令人收聲嘅好方法。除咗唔畀相反意見出現,樓主仲要不斷攻擊其他行家、股評人,煽動組員一齊狂踩其他人來抬高自己,令組員對樓主更奉若神明。久而久之,群組內成員好似入咗邪教一樣,樓主講乜都認同,佢叫去東,組員唔會去西,即使樓主做錯嘢亦有諸多藉口解釋,甚至牽強到話係市場嘅錯,咁都仲有人信先至恐怖,難聽啲講真係同入咗邪教信晒教主無分別。

不過又唔係所有收費群組樓主都係騙徒老千,阿Man相信仍有開班授徒者真心想同學生成員交流投資心得,只不過功夫到家嘅職業炒家或專業行內人有冇咁多時間喺股市交易時段招呼學生組員,呢個問題值得大家去諗諗。

對於有意報讀投資班或加入收費群組嘅投資初哥,阿Man想奉勸一句,切勿急於求成,以為入到收費群組等於唔使用腦、唔使做功課,只要聽教聽話就有料收、有錢贏。世上冇不勞而獲嘅事,天道酬勤,不如多花時間學好基本功。

麥狄文(徐狄怡.證監會持牌人)

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads