《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2018年5月9日
上市公司高管辭任或離職嘅事經常發生，通常公司都會如常發通告公告天下，對於相關高管嘅離開，除非好似「超人」退休咁大件事，否則相關事件唔會被重視，亦鮮有大篇幅報道，尤其係啲二三線公司同股仔，基本上連本身嘅小股東都唔會太緊張或關心相關消息。
其實，高管離職原因不外乎嗰幾個，例如退休、公務太繁忙、身體健康問題，同埋想畀多啲時間屋企人等等。呢啲原因真真假假，不外乎藉口一個，通告呢頭睇完，嗰頭都忘記得一乾二淨。
好似早排有上市公司宣布高層辭任，公司當然批准，而高層辭任原因就話要專注其個人業務，並確認同董事會之間無意見分歧，即係好嚟好去嗰隻。通告出完都無乜人為意，偏偏呢，阿Man就聽到單料，正正係關於呢位高層。
嗰個訊息係有關深圳市人民檢察院一則案件嘅消息，標題係「重磅！市检察院以涉嫌组织、领导、参加黑社会性质组织等罪名批捕陈某森等104人」。由於阿Man想原汁原味咁畀大家睇條標題，所以係簡體字，唔好覺得奇怪。
呢則檢察院消息，內容係指以陳某森為首嘅黑社會性質組織成員，盤踞喺寶安區福永一帶，多年嚟有組織咁故意傷害、聚眾毆鬥、故意毁壞財物、強迫交易、開設賭場、尋釁滋事、敲詐勒索、容留他人吸毒、誣告陷害等違法犯罪活動，簡單啲講，除咗好事之外，乜事都做。
除咗上述犯罪行為，黑幫亦要搵錢搵食，嗰篇消息亦有指呢班黑社會喺勢力範圍即係佢哋嘅地盤內壟斷唔少生意，包括廢物回收、黑市煤氣、啤酒供應，甚至一次性碗筷等，唔單止擾亂當地社會治安，影響當地經濟發展建設，以及居民百姓社會生活。
傳有匿名舉報未獲跟進
呢篇法院消息，亦有報道有關破案過程，係以組建辦案團隊提前介入（其實阿Man唔多明點樣提前介入，事關提前介入咗，黑社會又點會犯事呢？），而深圳檢察院已按照逮捕案件證據，拘捕相關人等104人，當中包括陳某森。
爆料畀阿Man嘅線人話，涉案人物陳某森，實情就係香港上市公司嘅高層，而呢份檢察院文件喺上月開始廣泛流傳，剛好就係高層辭任通告之後。
線人爆料話，呢位前高層就喺上月中喺內地被捕，所以香港呢邊上市公司急急要佢「被辭任」。據聞有關陳某係內地黑人物嘅事，早於去年已有人匿名去信SFC舉報，不過SFC因為冇證冇據，加上一向都唔受理匿名舉報，有關事件就無人跟進。
不過究竟呢位前高層是否就係檢察院案件嘅首腦人物陳某森，暫時未能證實。若果呢個陳某實際上係嗰個陳某，上市公司公布時又係咪能夠以咁嘅理由解釋，隨便作個辭任原因，抑或要如實報告高層因在內地被捕而「被辭任」，究竟有冇任何準則或通報機制可循，呢層阿Man都要問一問專業人士。
麥狄文（徐狄怡．證監會持牌人）
訂戶登入
| 下一篇： | 貿戰喘息強升 向好格局初呈 |
| 上一篇： | 本土科創化Like為Coin |
