《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2018年2月21日
港交所（00388）將於下星期三派成績表，睇番舊年港交所雖然失落全球IPO集資冠軍，但每日平均成交額回升，估計港交所應該可以交出一份靚仔嘅成績表。
其實今年港交所業績應能勝舊年，至少喺IPO方面，有機會重奪冠軍集資交易所寶座，因上個月沙地阿美已表示有意落戶港股IPO，其集資額或高達1000億美元，勢成全球有史以嚟最大集資額，呢鋪肯定係得阿美，得天下。
除咗沙地阿美重頭戲之外，其實今年港交所嘅焦點係同股不同權進行讓步，上次阿Man都講咗，這意味阿爺同美國佬拗手瓜鬥搶全球資金池嘅錢之外，另一個任務係要吸引所有中科股回流香港上市，港交所任重道遠。
記得去年10月底，港交所曾經喺「2017香港金融科技周」派市場發展科高級副總裁Michael Chan發表演講，題目為「港交所呈現︰金融科技IPO之路」。當時陳總表示希望更多金融科技公司來港上市，港交所將會喺業務發展、監管政策同埋技術建設三方面配合。
近來中國唔少金融科技巨企，選擇奔往美國上市，而之前阿里巴巴放棄香港上市，港交所之所以輸咗畀紐交所，正正係因為同股不同權制度上，港交所完全唔肯讓步。
不過對於同股不同權制度，港交所已有解決方案，作出讓步之餘，亦睇得出條件係針對大部分中國金融科技巨企，好似小米科技、平保（02318）將分拆嘅陸金所、阿里巴巴旗下嘅螞蟻金服、騰訊（00700）旗下嘅QQ音樂、鬥魚同快手等等。
據《中國基金報》報道，單係兩大科網巨頭老大雙馬，馬雲跟馬化騰投資嘅公司中，擬上市嘅公司不下100間，呢批公司嘅總市值閒閒地超越一萬億元人民幣，甚至更高，可見呢場金融科技IPO戰，港交所實非打不可。
單單睇番舊年眾安在綫（06060）IPO反應熱烈，亦將吸引其他中國FinTech業者嚟港股上市。由於流動科技普及，令FinTech喺中國快速發展。JPMorgan估計，2020年中國FinTech市值將增至4600億元人民幣，2016年至2020年的年度複合增長率高達44%。
除咗上述未上市嘅金融科技企業，仲有已經喺美國上市嘅一批中國科網股，如百度、阿里巴巴、新浪網、搜狐網、網易等，都成為港交所獵物，即使呢批股份唔取消喺美國嘅上市地位，亦希望吸引相關企業嚟港股作第二上市。
不過要吸引中國金融科技企業嚟香港上市，除咗喺同股不同權制度上作出讓步之外，阿Man認為港交所要加快審批程序，目前一般公司整個上市過程，需時約9個月或更長時間，當時公司符合上市資格之餘，上市團隊配合亦好重要，一旦上市過程有乜嘢出錯，至少要再花多一年時間再搞上市。不過近呢一兩年，公司申請上市審批時間似乎愈嚟愈長，問題原來係最根本嘅人手不足。
工作量大形成惡性循環
阿Man聽聞港交所上市科近呢兩年處理嘅上市公司數目愈嚟愈多，但具備豐富經驗進行審批工作嘅員工數目一直追唔上要應付嘅工作量，上市科個個做到隻積咁嘅樣，唔少為咗生活平衡，寧願另謀高就，惡性循環下，人手不足問題一直未能解決，甚至有惡化跡象。
睇嚟港交所要跟花旗國及米字旗交易所打呢場IPO仗，真係要好好解決呢個問題，否則真係有生意亦做唔嚟，有金亦無力去執。
麥狄文（徐狄怡．證監會持牌人）
訂戶登入
| 下一篇： | IGG手遊客遍全球 值博 |
| 上一篇： | 股票vs代幣：兩把尺量度公司價值 |
