《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2017年12月20日
港交所（00388）已就《上市條例》作出修訂，目前已敲定納入同股不同權企業喺主板上市，有關方案建議容許業務成熟並預期市值最少可達100億元嘅新經濟股上市，董事只須持有9.1%股權，就可以保留話事權。
市場對港交所呢個決定反應正面，認為港交所可加強競爭力，爭取到更多新經濟企業來港上市。不過新經濟股表現差異都幾大，加上愈嚟愈多新經濟股開始擴股增資，喺市場供應大增之下，難再靠稀有價值嚟炒高股價。
同股不同權企業講緊市值至少要有100億元，其實每年會有幾多過百億市值公司上市，大家心中有數。大部分新股上市估值，莫講話連一半市值50億元都冇，集資額通常係10億元樓下，呢類公司喺基金經理眼中，就係屬於中小企業。對於中小企上市初期，一般傳統基金都唔會太有興趣，甚少會落飛認購，呢類公司上市招股一般係靠私募基金或者一班高端資產投資者同專業投資者（PI）入飛配售。
交投疏落集資難
講到呢度，阿Man終於入正題，講緊就係今年下半年開始，唔少市值較細嘅新股上市招股時遇到嘅問題。由於年中發生「粉塵爆炸」事件，「謎網50」股份大部分跌到七個一皮，個別股份仍然拉閘停牌，更有股份被DQ，甚至當中有公司管理層已被請去飲咖啡，可能涉及刑事罪行。
「謎網50」股份鎖死咗市場唔少資金，尤其係一班活躍於市場嘅高端資產投資者同PI，令到呢班投資者綁手綁腳，再無多餘資金投放於下半年上市新股。當然下半年仍然有唔少新股賣個滿堂紅，講緊係大家耳熟能詳嘅閱文（00772）、雷蛇（01337）同易鑫（02858）呢類晒士有番咁上下兼有名牌效應嘅股份，就梗係容易賣飛，大把基金同投資者自動波入場，多多貨都唔夠派。
相反，一般中小型企業上市，少咗PI資金，即使成功申請上市，去到賣飛一刻，包銷商同賬簿管理人都相當頭痛，幾乎要跪埋班熟客先埋到飛，可以講得上係出貨無門。再睇番呢類公司上市後股價表現，十居其九係潛水，兼且交投疏落，搞到本來業務不俗嘅公司，即使上市後，亦未能利用上市平台繼續集資發展業務。
莊家制未必壞事
唔知港交所對於呢個問題有何對策，會唔會考慮引入莊家制，就好似衍生工具一樣，只要有合法規管，莊家制唔一定係壞事。當然莊家制係雙面刃，要小心處理保障投資者，否則市場被一小撮操控者玩晒，同樣係死路一條。反觀目前的情況令上市新股趨向兩極化，大型企業往往出現巨大超額認購數字，而中小型企業卻乏人問津，令新股上市表現出現更大差異，資金更為傾斜。
麥狄文（徐狄怡．證監會持牌人）
訂戶登入
| 下一篇： | 金融股當炒 環保追落後 |
| 上一篇： | 加密貨幣勝過博彩? |
