熱門:

2017年7月26日

麥狄文 金融街密語

阿爺權鬥令企業更難走出去

十九大前,阿爺權鬥轉趨白熱化,唔同派別最近通過唔同渠道傳出兩個不同版本嘅十九屆常委名單,而當中最惹人關注係,一直被視為習大大重要政治盟友,兼專打大老虎嘅中紀委總管王岐山嘅去留。咁啱喺呢個時候,原重慶市委書記孫政才因涉嫌嚴重違紀,正接受中紀委調查。一直被視為十九大政治常委大熱門人選之一嘅孫政才落馬,顯示出習大大核心繼續保持高度反貪腐,唔再着重一味年輕化嘅用人理念,換句話講王岐山留任機會大增。

不過一向被視為廉潔正直嘅中紀委總管王岐山,喺年初曾被身處海外嘅內地富豪郭文貴,多次放料抹黑,把王岐山家族背跟海航集團扯上關係。不過郭文貴爆料後,另一與「老領導」有千絲萬縷關係嘅肖建華,即被送回內地「配合調查」,反映習大大核心對試圖左右政局的「老領導」絕無手軟,而黑材料主角海航亦慘遭祭旗。

海航慘遭祭旗

唔知係咪呢個原因,最近盛傳為內地排查對象之一嘅海航,剛剛向員工發公開信,正式披露集團股權結構詳情。而一直備受市場關注的海航神秘大股東貫君(Guanjun),竟未有出現在股東名單之上。而內地有報道指相關持股已捐贈予海南省慈航公益基金會,並惹起揣測,為何貫君喺今次調查風暴中「被消失」。之前郭文貴爆料,正正係指海航疑與王岐山家族關係密切,而貫君亦與王岐山有關聯。

除咗海航之外,今次阿爺鐵腕治理金融亂象,另一重點打擊對象就係安邦,安邦之所以成為另一排查對象,係因為集團一直對內地監管機構嘅暗示置若罔聞,加上安邦嘅領袖同樣被視為「老領導」勢力,皆因吳小暉正正係鄧小平外孫女婿。基於呢個特殊身份,安邦做嘢一向踩過界,自10年前內地監管機構放寬包括安邦在內,幾間中國保險公司進行海外投資,要安邦一直高調參與多項海外交易。

即使在2015年內地股市崩盤,政府嚴打公司及個人將大筆資金轉移到國外,安邦嘅收購活動仍未有停落嚟。為咗擴大海外版圖籌集資金,安邦更推銷多隻理財產品集資,引起監管機構關注,一旦呢啲產品賴嘢,將為中國脆弱嘅金融體系帶嚟極大震盪。而安邦千錯萬錯,就係舊年同花旗國總統女婿搭上,試圖投資庫什納(Jared Kushner)擁有部分權益嘅一幢辦公大樓。

雖然最終呢單交易告吹,但呢單潛在交易令北京受到指摘,有人認為北京試圖干預美國政治。睇嚟呢位老領導孫女婿,忘記咗中國企業嘅重要規條:未得到領導人明確支持,盡量不要搞到中國嘅外交政策。無論海航抑或安邦今次傳被排查,都反映咗以後內地企業要走出去更加困難,隻手伸得愈遠,又或者具有老領導影子嘅企業,愈容易引起阿爺注意,至於一直靠海外併購去擴大版圖嘅內地企業,今次手尾長……。

麥狄文(徐狄怡.證監會持牌人)

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads