混改令民企國企平起平坐

國企混合改革係近呢幾年阿爺重點推動嘅計劃，目的為一直未能好好發揮其商業價值嘅巨無霸國有企業，引入新股東及注入資金，以及引進新股東。國企混改不僅令國有企業營運上提高效率，引入民間資金令管理上有望跟國際企業睇齊，過往係國家負累嘅巨無霸，或可透過改革成為一級國際巨企。

喺2016年底較為震撼嘅國企改革，就係花咗超過半年時間完成混改嘅雲南白藥集團（000538.SZ）。2016年12月28日，白藥控股混合所有制改革事項獲雲南省政府批准，雲南省國資委、新華都實業集團股份有限公司跟雲南白藥控股有限公司三方簽訂合約，新華都作為增資方取得白藥控股五成股權，增資總額為253.7億元人民幣，跟雲南省國資委各持五成股權，國企民企平起平坐。

雖然早喺2013年第十八屆三中全會已提出「積極發展混合所有制經濟」之後，混改成為新一輪國企改革重頭戲，但3年以嚟突破有限。今次雲南白藥嘅改革模式亦為國企混改創出一條新路，係一個突破性樣本。今次改革係一次由上而下嘅國企改革，間接改變咗雲南白藥嘅股份結構。最重要係雲南白藥喺7年前經歷咗一場轟動全國嘅股權官司，新華都掌舵人陳發樹終如願入股雲南白藥。

陳發樹入股雲南白藥之後，心中已有全盤計劃，由於佢深信中國嘅健康產業大有可為，好似美國同類企業強生同輝瑞，都係兩三千億美元市值嘅巨企，雲南白藥未來有望成為過千億美元市值嘅超級巨企。陳發樹咁有信心，係因為雲南白藥有一支優秀團隊，由於之前係國企關係，難聽啲講做又三十六，唔做又三十六，咁嘅情況下，雲南白藥都可以邁向多元化。如今混改成功，以後能夠實現股權激勵，員工有獎金又有獎品，未來肯定更賣力，公司一定可以獲得更好成績。

雲南白藥鋪路港借殼

阿Man收到風，陳老闆早已喺香港呢邊傾好一隻殼，為雲南白藥喺香港上市鋪路，聽聞短期就會有公布，至於邊一個冧巴，阿Man都唔知，留意吓近期異動嘅主板細價股或者有啟示。其實陳老闆並唔係香港股市嘅初哥，而且之前都係投資國企股。2000年陳老闆參與福建紫金礦業（02899）改制，成為第二大股東，後來紫金礦業分別於香港及內地發行H股及A股。2009年陳老闆又曾經花超過兩億美元入股青島啤酒A股7%股權，成為呢間百年老字號第三大股東。

麥狄文（徐狄怡，證監會持牌人）

下一篇：	情場得意賭場也得意？
上一篇：	AI將支配投資市場?

文章：

— 麥狄文

更多...