《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2017年2月8日
新正頭特別多團拜春茗等聚會，阿Man又可以跟平時冇乜時間見面嘅行家聚首一堂。大家碰面都係八吓最近有乜好搞，呻吓家陣生意難做。席間有行家講開，上星期阿Man喺「金融街密語」慨嘆家陣所謂股神多數名大於實，唔少行家都話啲基金經理今時唔同往日，講嘅係工作性質，唔係話唔想考自己眼光，而係想做生意嘅話，迫於向現實低頭。
班芬佬點解要低頭？只因坊間唔少基金，又或者資產管理公司嘅生意模式，跟過往有好大分別。公司賺錢嘅着眼點，唔再係靠芬佬投資眼光去賺取客人嘅performance fee（表現費），而只係靠每年「硬掘」一筆過嘅management fee（管理費）去過活。
舉番上星期某某基金做例子，基金幾隻最大倉位股份，舊年係就係勁升四成，但一日仲未沽貨鎖定利潤，都係「蜑家雞見水」，有得睇冇得食嗰隻。至於基金表現咁勁，正常計收取可觀表現費啦，只可惜明眼人都知呢幾隻貨源極度歸邊嘅殼股，股價再自high，炒到天咁高，都並非靠基金經理嘅選股眼光，而係靠背後金主發功，要求基金幫手圈貨坐貨，所以基金經理只能坐定定，任由金主擺布。基金既然唔係靠炒起家，表現費自然免問。
內地金主走資樂園
事實上，近呢幾年間，港股唔再有類似過往嘅金手指基金，又或者跟國產女股神雷同嘅炒股基金出現。市場過往統一做法係將一啲小型企業由細養大，再轉售畀中型基金，大型基金又等多一年半載，發現其估值有所提升，再賣殼予準買家，又或者成交額夠的話，一邊做大龍鳳，一邊散貨出街畀散戶。搞一壇咁嘅計劃，通常都要花好幾年，唔少中小型基金曾經因此起朶，記得當年嘅思捷環球（00330）就係咁由十幾億市值貨仔，一路湊大到過百億市值。
呢幾年情況確係唔同，單單舊年SFC就批出過百個資產管理牌照（9仔牌），當中大部分背後是內地金主出資，目的係利用呢啲9仔公司將內地資金調出香港，方便走資。方法係透過呢啲9仔公司搵項目投資，九成都係IPO又或者係pre IPO；新股上市後，幾個坐晒貨嘅基金自己交波，一班自己友將件貨狂舞上去自high。喺呢個過程當中，基金經理角色可有可冇，咁都叫基金，究竟係玩緊乜嘢概念？難怪有行家話而家生意難撈。
有前輩慨嘆香港股票市場好似漸失過往嘅集資融資功能，反而成為內地金主走資樂園。而佢哋所控制嘅股份全部由自己友圍內操控，根本唔受外人玩，即係一般散戶炒家連參與機會都冇，難怪市場IPO一直有增無減，但成交額卻愈玩愈縮。少咗公眾參與，冇基金真正買賣，莫講話唔會有股神誕生，塘水滾塘魚落去，港股簡直係自殘。
麥狄文（徐狄怡，證監會持牌人）
訂戶登入
| 下一篇： | 內險為何急升?買入原因只一個 |
| 上一篇： | 農產品牛市或重臨 |
