《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2017年2月1日
《金融街密語》雞年首個交易日同各位見面，當然要拜個年，祝各位倉位日日都「金雞報喜」，炒乜炒物都「雞不可失」，投資回報「鶴立雞群」，再祝各位雞年行好運。
唔知大家有冇留意雞年到之前有單新聞，話說來自上海一位女賭神，喺金沙中國（01928）旗下澳門賭場贏到開巷，未到新年已發財，抬走2億過肥年。賭場出賭神，股場當然見股神，奈何呢幾年港股真係鮮有出股神，就連過氣女股神劉央都話唔玩港股，港股仲邊有咁多股神。不過，喺2016年就出咗位股神某某，只不過呢位股神亦只係表面風光，實際功力有幾掂，大家心中有數。雖然佢旗下「全權委託投資組合」去年回報超過四成，但睇真啲呢個組合嘅倉位，暫時都係「蜑家雞見水，有得睇，冇得食」嗰隻，只不過係紙上富貴。
贏錢靠瞓身玩殼股
過往係某大行星級分析員嘅某某，一直以嚟都信奉價值投資，跟花旗賭神畢非德一樣，奇怪係旗下嘅「全權委託投資組合」，去年贏錢竟非靠呢一套，反而瞓身玩殼股。其基金表現報告顯示，投資組合去年大賺46%，5大持倉竟全部係市值低於10億元、被視為「種殼」嘅細價股，風險之高令人咋舌。
有別於一般港股基金嘅持倉，某某旗下嘅頭5大持倉盡是殼股，包括義合控股（01662）等，回報均不俗。而當中最賺錢嘅倉位，係另一隻半新股譽宴（01483），截至去年底上升360%，回報率驚人。
某某過去從未談及沾手殼股，對上一次接受傳媒訪問時，講嘅細價股係市值82億元的中國龍工（03339），而推薦股份均屬藍籌股，如港交所（00389）跟騰訊（00700）等巨無霸。
正常或稍具規模嘅港股基金，甚少全線重倉細價股，一來欠缺流動性，二來「晒士」細基金連入貨都有難度。不過，近年唔少基金早喺殼股上市之前，又或招股期間買入等運到，主要因為近年殼價係咁漲，單殼價值5億元樓上，而上市之初只有兩三億元市值嘅殼股，等上市後一兩年賣殼成功，回報可以倍數計。
掛名基金經理
某某投資風格有冇真正轉變，可以睇番佢間資產管理公司股權變動，某某2009年創辦一家資產管理公司，舊年賣盤一位予資深財金人士，不過留任打理投資。新主為一個私募基金話事人，處理直接投資跟企業融資項目，即係本身就有唔少細價股併購買賣實戰經驗，難怪投資殼股咁有心得。如此一來，某某只不過係掛名基金經理，真正落注嘅係該位新主。
唔少金融圈中人對2016年股神某某，旗下組合錄得超過四成回報視為笑話一則，甚至有啲不屑一顧，皆因圈內人都明白，要投資呢類半新股殼股，除非係自己友，否則喺「孖屐」絕對買唔到貨；至於上市前入飛可獲配股，根本就係同莊家一齊「圍飛作歹」。即係某某個組合投資回報有幾多成，甚至以倍數計都好，絕非靠基金經理投資眼光，所謂股神亦只係浪得虛名。
麥狄文（徐狄怡．證監會持牌人）
訂戶登入
| 下一篇： | 跨年招股選擇多 |
| 上一篇： | 恒指五度三頂背馳 本周不容有失 |
