《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2017年1月25日
噚日阿Man喺「盤房來料」提過，股仔急跌後博反彈，好大機會成為大鱷點心，尤其係呢類股仔，炒上時靜雞雞，散戶十隻有九隻都跟唔到，反而股價開始插水，成交定必齊齊放大，慌死冇人肯跟住玩。
入場參與炒作呢類股仔，本來已屬藝高人膽大，再仔細望望各項基本因素同技術指標，簡直覺得買呢啲股應該係儍嘅，稍有判斷力都知呢類股仔十賭九騙，話之有人同我講明日一定升，炒完一鑊就一鑊完，day trade鋪鋪清還好，坐得貨嘅十居其九係因為暴跌被綁死焗坐，坐坐吓通常已忘記初衷（贏錢），甚至俾無良公司連環追殺（供股），再供等於倒錢落海，唔供分分鐘渣都無埋，總之點都係死路一條。
既然明知呢啲股仔咁恐怖，點解仲有缸邊友肯入場？能夠喺魚缸大力吸金，兼且客似雲來嘅股仔，通常離唔開兩個主要因素。首先係具備一個「大球場」條件，叫得大球場，當然係買賣家兩邊都球球聲，每個價位有源源不絕兼且數量龐大嘅排盤參與，缸邊友易出易入。大球場唔單止進出容易，通常係細價股得嚟一兩個位已夠轉身，對於缸邊友或靠炒搵食嘅卜架，大球場股係有一定值博率。
除咗大球場外，缸邊友亦盲目追求「名牌」，唔少股仔泊住個大碼頭，以超低價批股畀巨無霸企業，表面雙方就話要合作乜乜物物，實情只係「借名發揮」，利用入股方嘅名氣，將股份炒高派貨。
本來入股呢啲七八線股仔，對巨企嚟講濕濕碎，但呢個世界無人嫌錢腥，出個名收吓公仔紙，接近零成本操作，一旦股仔初炒起，巨企無啦啦又多筆收入，喺上市公司層面，擺明係雙贏局面，話之最後輸死你班小股東，至於貪勝炒鬼更話之你，所謂有強姦，冇焗賭，自願入場，贏輸各安天命。
阿Man最睇唔過眼就係個別股評人，又或者股票推介專欄，慌死缸邊友唔入場參與玩呢啲吸血股仔，往往夾埋班莊家玩「大合唱」，唔單止魚缸炒家入場，仲要吸引埋散戶玩埋一份，務求令到大球場夠人氣兼鑊氣，方便莊家派貨兼殺倉。
獲恒大（03333）跟騰訊（00700）以每股6仙入股嘅恒騰網絡（00136），可以話係上述吸血股仔方程式嘅近日代表作。如果大家心水清，會發覺此股自去年12月起，一直有唔同股評人不斷唱好，單單一個月之內，粗略估計唱好專欄不下十次，而且更分布於不同媒體，慌死人走漏眼咁款。但恒騰一邊被唱好，股價一邊喺12月初見頂0.76元後回落，噚日股價雖然反彈26%，收報0.211元，但由「大合唱」開始短短個半月，股價跌咗七成有多。
兩大巨頭當年以每股0.6仙購入千多億新股，其後2合1，2015年8月抽上1.42元高位，較巨頭入股成本價升過百倍！幕後莊家事前已部署好圍飛、批股及發行認股權證多重動作，沿途派貨贏到開巷，直至最近仍不斷行使股證套現。
一般缸邊友同炒鬼，淨係睇住近期注資計劃中每股作價0.555元為指標，完全忘記大哥成本僅1仙、成績表繼續見紅等負面因素。
麥狄文（徐狄怡．證監會持牌人）
訂戶登入
| 下一篇： | 創板新股有頭威冇尾陣 |
| 上一篇： | 美德日股走勢淡 港交所5浪尋底 |
