《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2016年11月23日
上期講到今次上市架構改革，係因為有人覺得港交所（00388）商業跟監管雙層角色存在利益衝突，目前嘅上市委員會制度，有瓜田李下唔夠公正之嫌，所以要透過改革防止利益衝突。
自從呢份改革文件出台後，業界簡直好似食咗炸藥咁躁，其中上市公司商會副主席羅嘉瑞直指建議「將讓香港市場變成一潭死水」。香港會計師公會會長張穎嫻則表示，「過分監管或使香港競爭力、自由度下降」。就連本來最初企喺證監會嗰邊支持改革建議嘅張議員，又或者係美銀美林等外資大行，近日亦開始轉軚唔再撐證監。皆因唔少人發現今次唔單止係證監借改革奪交易所嘅權，直頭係要「食咗」交易所，成個市場將來係證監話晒事，港股擺明A股化。
睇埋上市科
A股乜嘢環境大家心照，中證監過度干預一早出晒名，而彼邦米字旗國亦曾發生同樣情況，上市審批權喺2000年從倫交所，轉移到英國證監主導嘅上市管理局之後，倫交所翌年上市數量即大跌近半，市場流動性嘅排名亦從當年嘅全球第二，滑落至目前嘅10名之後。
未來喺新制度底下，上市科將獨立出來，唔再為港交所嘅工作目標而服務，而係從企業申請上市一開始就貫徹證監會嘅思路。以後港股上市嘅主導機構將會係證監會，而唔再係聯交所上市委員會。因為證監會唔同港交所係一間上市公司，並冇誘因去貼近市場，了解市場需要，從而吸引更多企業來港上市，作為監管機構，對於上市申請總係不求有功，但求無過。
目前一般公司申請上市，閒閒地都要搞三五七個月，主要係交易所嘅上市委員會開綠燈後，點都要等埋證監會點頭，成個上市審批程序先完成，偏偏證監會就長期人手不足，搞到待批個案堆積如山。聽聞唔少要申請上市公司，都希望盡量喺新架構改革之前提交申請，皆因家陣證監把最後一關都要咁耐，更何況未來由佢哋全權負責，容乜易一個上市申請要超過一年，到時又要花多筆錢再核數，直接令上市成本大增。
香港作為全球主要金融市場之一， 上市企業素質持續下滑確係一個大問題， 最終投資者會因為保障不足而離去，令市場失去競爭力。不過上市審批過於嚴苛，將增加企業上市嘅財務跟時間成本， 減低企業嚟香港上市吸引力，兩者要取得平衡唔係咁容易。加上一直困擾港股嘅殼股、妖股、殭屍股問題，係咪單靠收緊上市審批就可以解決呢？今次港交所跟證監確需花啲智慧去化解呢個危機。
麥狄文（徐狄怡．證監會持牌人）
訂戶登入
| 下一篇： | 投資者重視可持續發展指數 |
| 上一篇： | 新興市場遇挑戰 |
