《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2016年11月16日
喺過去一個weekend，反對上市架構改革諮詢文件嘅陣營搞遊行，可惜結果只大概200人參與，奇怪係呢班人接受媒體訪問時，答覆總係吞吞吐吐，更有工作人員阻撓遊行人士接受訪問。雖然帶頭遊行嗰班都係業界熟悉嘅面孔，如證券商協會蔡思聰、股評人林家亨、細價股股評人詹劍崙等，都話係以個人身份出席，不過，硬係唔多覺有其他缸邊友或者行家現身。
唔敢遊行怕秋後算賬
後來有人踢爆有遊行人士原來係臨記，究竟係咪金融界人士對有關上市架構改革毫無意見，所以冇人出嚟遊行呢？答案啱啱相反，以阿Man了解，幾乎大部分市場參與者都勁反對今次嘅改革建議，認為證監會借改革為名，奪權為實，獨攬大權。既然係咁，點解遊行人數得小貓三四隻，仲要搵埋老臨充撐場面咁慘慘豬？原來係行家怕一旦參加咗遊行，唔覺意被人點咗相，日後被秋後算賬就麻煩。
其實，近年證監會嘅權力愈嚟愈大，加上公司申請上市即使已獲得交易所上市委員會通過，證監會仍有最後否決權，最活生生例子就係阿里巴巴喺2013年被拒絕，原因係當時證監會堅持「同股同權」，以維護香港多年奉行的原則。從監管角度嚟睇，證監會咁做無可厚非，不過，證監仍然停留喺以金融、地產和製造業嘅年代，思維明顯跟目前科技企業市佔率愈嚟愈大脫節。
從商業角度考慮，阿里喺紐交所每天平均成交量約1500萬股，涉及金額達百億港元。阿里成功上市，將促使其他內地互聯網公司嚟香港掛牌，帶動互聯網股份嘅研究分析跟銷售服務需求，互聯網上市生態鏈亦能喺港股形成。有咗完整生態鏈，香港能吸引全球互聯網巨頭喺香港上市集資，前景一片光明。證監最終否決阿里喺香港上市等同倒米。
監管思維跟市場脫節
今次改革係因為有人話港交所商業跟監管雙層角色存在利益衝突，阿Man就唔多同意。港交所上市科冇政策同個案審批權，須提交上市委員會，而該會由28名成員組成，除咗一人係港交所CEO，其餘27人由證監佔半數席位嘅上市提名委員會提名，其中8名是代表投資者利益，其餘19人分別代表上市公司和業界，包括律師、會計師、企業財政顧問跟證券行，獨立於港交所，各委員之間所代表的利益甚至可能有矛盾，呢個設計已足夠防止利益衝突。篇幅所限，下周再續。
麥狄文（徐狄怡．證監會持牌人）
訂戶登入
