2016年6月15日
2016年過了接近一半時間,上半年已先後有5間公司提出私有化,呢啲企業喺提出私有化前都有共通點,就係內地公司而非國有企業,市值至少都有50億元,公司估值偏低,又或是股價較NAV大幅折讓,而控股股東權益達五成或以上。公司股價長期低迷,嚴重偏離合理價格,對上市公司再融資係有負面影響,既然一間上市公司失去融資功能,大股東倒不如私有化公司,取消上市地位,除咗方便進行資源整合外,要通過各種事項毋須按上市公司標準程序,行政上得以簡化。
今年2月東鵬控股(03386)率先提出私有化,以每股4.48元向股提出私有化建議,較停牌溢價31.76%,涉資15.1億元,有關建議已獲股東會通過,公司將於下周跟港股講拜拜,於下周二開始除牌。上月輪到萬達商業(03699)主要股東王健林建議以每股現價52.8元,私有化H股及撤銷上市地位,呢次私有化涉資高達344.55億元,有錢就是任性,幾百億對於王健林嚟講濕濕碎,總好過公司估值長期被低估。
及至上月底,匹克體育(01968)亦表示計劃私有化,並回歸A股上市,暫未提出私有化價格,但市場估計每股價格應不低於去年配股價2.48元,才能獲得市場考慮。私有化熱潮持續,最近新鮮滾熱辣係月初宣布母公司有意私有化TCL通訊(02618),周一揭盅私有化價格每股7.5元,較停牌前有溢價34.65%,股價急升成交激增。
港股呢兩年表現不濟,一直跑輸國際上多個其他市場,即使A股去年經歷股災,現價平均市盈率仍達14倍,而港股平均市盈率只有單位數不足10倍。話就話港股市盈率低吸引內地資金南下掃貨,但喺上市公司角度,等南下資金嚟執平貨,倒不如主動出擊,回歸內地市場上市,可享有較高溢價及市盈率,喺估值方面攞番個話事權。
資金逼爆魚缸搶高股價
由於港股一向由外資基金主導,呢兩年喺外資全面睇淡中國經濟嘅情況下,對港股一直持無面畀態度,港股喺定價方面,可以話全無話事權。相反內地股市未有對外資全面開放,喺估值上顯得較為進取,畢竟內地投資者一直接受較高估值,只要公司質素唔係太差,喺資金逼爆魚缸情況下,股價自然被愈搶愈高。
阿Man估計內地企業「棄港投A」呢一股熱潮只係剛剛開始,內地企業提出私有化回歸A股上市將陸續有嚟,較有潛質「棄港投A」嘅大型民企唔少,好似國美(00493)同海爾電器(01169)兩間公司控股股東持股量分別為48.9%及56.16%,兩股市盈率只有10倍,相對內地上市蘇寧電器天價市盈率,實在係便宜得可憐。又好似曾受不利傳聞所影響嘅復星國際(00656),大股東持有逾七成股份,現價及預期市盈率只有7倍左右,亦係同樣具私有化潛質嘅內地企業。
訂戶登入
下一篇: | 點解要逼我請新移民飲茶 |
上一篇: | 透明可預測是香港市場精髓 |