熱門:

2016年4月20日

麥狄文 金融街密語

整治P2P網貸 二三線股當災

內地P2P網貸發展一日千里,但經營者良莠不齊,自2011年以來累計誕生接近4000間P2P理財平台,其中超過三分之一或1500間已「摺埋」或「走佬」,問題公司竟佔38%,難怪國務院要出手整治。而喺整治開始,理財產品陸續爆煲,更直接拖累本港唔少二三線上市公司股價急挫。

之前上海發「20條」打擊非法集資,驚動整個上海私募基金及理財產品業界,咁樣查一查等同引爆多個理財產品炸彈,而爆炸威力驚人,皆因有業內人士估計,內地理財產品規模已逾25萬億元人民幣,即近30萬億港元。當中已被查封嘅上海理財產品平台「中晉資產管理」,集資規模高達300億元人民幣,更曾活躍於投資香港二三線股。中晉「揩鑊」後,受波及嘅香港上市公司包括中國創新(01217)、華耐控股(01020)及中國趨勢(08171),現價均較出事前跌逾五成。

亂買股漠視風險

另一理財平台上海快鹿投資旗下金鹿財行,把電影《葉問3》包裝成投資產品「影視寶」,亦因票房醜聞而爆煲,相關股份明華科技(08301)、十方控股(01831)及大中華金融(00431)股價亦因此急挫。

其實,P2P網貸平台有發展是好事,有資金需要的公司或人士透過平台集資發展業務,投放資金於呢類平台嘅投資者,亦有渠道獲取較佳回報,本來係雙贏方案。最弊經營呢類平台嘅公司,集資手法類似私募基金,經營理財產品就當正自己係基金經理,近年積極喺港股出擊,不問好醜買入唔少質素參差嘅股仔,甚至狼死到買殼自己落場炒,完全漠視風險管理,幫襯咗呢啲理財產品嘅投資者,資金有乜辦法唔凍過水。

最離譜嘅係,呢類集資平台嘅揸Fit人,漠視風險管理不特止,投資股票完全唔理基本因素,只要對方肯畀回佣或着數,就胡亂入股或買入該公司債券,送錢畀啲垃圾級數公司使,等同將投資者資金倒入鹹水海。港股若然一直處於「大時代」,股仔禾雀亂飛當然過到骨,可惜大時代不過曇花一現,緊接股災嚟到一鑊熟,呢類產品爆煲亦難免。

有關當局肯正視問題當然係好事,不過,調查改革過程將要經歷陣痛,而涉及其中嘅香港上市股仔,股價亦難逃一跌。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads