大企業都發假盈喜呃like

上星期同大家講過港股自從去年中股災一役之後，唔少股民身家大縮水，最慘莫過於持有已貶值股份仲要供股揩多筆，呢啲真係躺着也中槍！

其實，市況差唔單止三四線公司大大鑊，大型企業亦唔見好得去邊，同樣搞埋啲小動作，竟然出動到發「假盈喜」，目的係為咗氹投資者落疊掃貨，抑或想刺激個股價做番好啲，呢樣真係不得而知。

阿Man想講係中國太平（00966）同中國人壽（02628）呢兩家大型企業，先後發過盈喜，只不過本報「板塊分析」專欄喺尋日已指出，兩間公司都只係發咗份「假盈喜」，提醒投資者接近業績期之際，免墮入假盈喜陷阱。

先講中國太平，公司表示去年全年應佔溢利較2014年的40.42億元錄得超過50%增長，實際上公司去年上半年已錄得58.58億元盈利，咁即係下半年盈利倒退咗九成。不過咁，中國太平全年盈利錄得逾五成增長，發盈喜都叫講得過去，呢個情況下都仲未可以「叉雞」間公司。

國壽「堅．盈警」

至於中國人壽份「假盈喜」就係離譜得緊要。公司去年全年應佔溢利將較2014年的322.1億元（人民幣．下同），按年增長5%至10%，盈利得嗰唔夠一成增長，其實仲有冇資格發「盈喜」咁巴閉？呢吓阿Man都吹佢唔脹，皆因監管機構對於上市公司喺乜嘢情況下發盈喜或盈警，其實係冇一定準則。只係國壽去年上半年已賺314.9億元，首三季賺338.4億元，即係下半年業績好有問題，去到最後一季甚至係錄得虧損，咁呢個情況之下，呢份「假盈喜」睇真啲係「堅盈警」。得嗰一成增長都走去發盈喜，似乎係呃like居多。

呢排市況欠佳已係不爭事實，三四線公司要籌錢，難透過批股集資，惟有焗住供股抽水，都有得賴係無計可施，但係晒士巨型如中國人壽，竟然要發假盈喜呃like，呢吓點講都唔通。

弊就弊在監管機構對於呢方面又未訂有準則，即係上市公司可以為所欲為，對於投資者而言，市場愈高透明度當然愈好，能夠掌握更多上市公司資訊，投資決策可以更有把握。偏偏監管機構任由上市公司發放呢一類容易誤導投資者嘅訊息，呢一吓真係防不勝防。

所以，阿Man幾時都緊記，小股東永遠肉隨砧板上，要做個精明投資者，唯一就係多花時間做功課，仲要「一眼關七」，先有機會避免墮入陷阱。