熱門:

2016年1月6日

麥狄文 金融街密語

阿爺最憎俾人穿櫃桶

內地股市真喺夠晒經典,今年首個交易日推行熔斷機制中晒兩口孖寶,本以為大量禁售股解禁時推此機制,有助減輕沽壓,點知反而嚇怕股民,兼拖累環球股市,一齊陪葬,呢鋪阿爺都算捉蟲了。其實試過去年7、8月股災出現逾千股份跌停板,引發更大量沽壓及引起市場恐慌後,阿爺應預知當跌市時忽然冇得trade有幾大鑊,仍要引入熔斷機制實在值得商榷。

講番股災之後阿爺除咗救市之外,就係接二連三拉人封艇,懲治業內不法分子,打擊金融犯罪活動。話說已經停職查辦嘅證券行話事人、著名基金經理、中證監高層有關人等,今次阿爺要嚴懲,不單只係洩露內幕消息同非法造空,以權謀私咁簡單。呢班人最大罪係勾結外國勢力,夾埋鬼子佬穿阿爺櫃桶。話說當去年第一季,內地股市仍行情火熱,炒到出煙之際,阿爺已feel到唔多對路,尤其係股民以驚人槓桿借錢炒股,擔心呢個煲將爆得好大鑊,所以計劃整頓呢種風氣,並尋求股市去槓桿化。

上述有關人等作為行業內舉足輕重嘅人物,對整個去槓桿化同股市降溫計劃瞭如指掌,唔好好配合阿爺改革行業,反而將計劃告知鬼子佬對沖基金。先喺阿爺出招叫停兩融前沽貨兼造空,仲要客氣到借埋貨畀對方,當然亦唔少得大手沽空股指期貨。當阿爺開始出招煞停股市,呢班大爺就繼續大手掟貨,直至到缸邊友恐慌拋售,人踩人之下上證指數就由6月高位5000點,短短兩個月內急挫三成,佢哋先施施然填番啲貨兼且買凸,皆因早已預知阿爺會出手救市,又派番之前撈番嚟嘅平貨俾阿爺。如此一來一回,阿爺救市嗰4000億,竟有四分一落咗佢哋個袋。

股市爆煲阿爺救市已中晒招,仲要知道有籠裏雞作反,串同鬼子佬基金穿櫃桶,咁樣俾人剃眼眉已把幾火,仲要唔見咁大舊錢,當然要嚴懲呢班人。至於將會點樣懲罰佢哋,阿Man知道有個潛規則,若然佢哋肯嘔番舊錢出嚟,兼坦白交代的話,將會輕判有期徒刑,遲吓仲有機會保外就醫。至於交唔番條數兼且唔合作的話,咁就大鑊喇,即使閣下走到天涯海角,阿爺都會聯絡到你,再畀機會你贖罪。咪以為逃之夭夭去咗外國就冇事,即使閣下賴死唔肯返祖國自首,兼夾私吞公款唔交番條數的話,將會成為「死神來了」嘅主角,喺外國遇上各種意外,必定係有錢亦會無命享。

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads