《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2015年12月16日
呢期最震撼中港兩地股壇嘅事，當然係被喻為「中國畢非德」嘅上海復星（00656）董事長郭廣昌上周被傳失聯，復星系停牌兩日後，郭廣昌即現身公司年度工作會議，並為周一復牌通告簽署，不過，復星管理層為免公司受拖累，即指出郭廣昌協助調查是配合司法機關查證，且「更多側重個人」，實行你死你事，並非公司有問題。復星國際復牌後跌勢較預期溫和，管理層大派定心丸呢招止得下咳。
不過，郭廣昌失聯個幾月前，另一位上海投資界風雲人物，有「中國索羅斯」之稱嘅上海澤熙投資管理總經理徐翔亦被公安帶走，睇番上個月落馬嘅上海副市長艾寶俊，跟郭廣昌同埋徐翔關係密切，而徐翔旗下基金持有人，更涉及多名上海幫江派官員同紅二代，不足兩個月，兩個上海投資界巨頭相繼出事，令人聯想到阿爺正加快清算上海幫勢力。郭徐二人投資網絡牽連廣泛，一旦被清算，定必令投資市場掀起巨浪。
傳清除上海幫勢力
其實，民企老闆失聯出事唔算咩新聞，當中最為人熟悉嘅同類事件，莫過於雅居樂（03383）主席陳卓林去年曾傳被調查，期間陳亦與公司失聯；其後於9月時集團宣布陳已被昆明市政府人民檢察院「指定居所居住」，簡單講即係被軟禁。當時雅居樂嘅債券價格大跌，主席一職則由其妻陸倩芳及弟弟陳卓賢共同擔任。不過，陳卓林被軟禁兩個半月後，最終重獲自由並返回公司重掌統帥之位。
換句話講，郭廣昌日後若「有乜冬瓜豆腐」，亦唔代表係復星末日之時，況且阿爺打老虎還打老虎，為咗對公司層面構成最小震盪，喺年底結算前嗱嗱聲放一放郭廣昌出嚟露面，順道讓公司復牌，免得坐咗貨嘅基金手貨停牌冇晒value。
至於公司即把握機會跟其劃清界線，指公司運作全無影響，當然希望投資者手下留情，咪大大力掟貨摧殘股價。講真，一間公司掌舵人失聯，對公司帶嚟震盪在所難免，但一間有番咁上下規模嘅公司，唔應該因為單單一個人而影響運作。
國美老闆「永不失聯」
就好似當年國美（00493）創辦人兼大股東黃光裕因犯非法經營罪、內幕交易罪、單位行賄罪，喺2010年被判處有期徒刑14年，最初確對股價構成負面影響，但其後公司運作一切正常，公司運行至今亦唔見有問題，可見冇咗個掌舵人都唔係公司世界末日，更何況只係失聯呢啲新常態。最近，黃光裕第二度獲建議減刑，股價亦唔見得受刺激而大升。不過，一直有小道消息話，黃光裕呢幾年一直喺獄中遙遠控制住公司，跟管理層緊密聯繫，並參與一切重要管理決策。若然呢單料係堅嘅話，呢個民企老闆可以稱得上係永不失聯的民企老闆。
訂戶登入
| 下一篇： | 勿胡亂沽空 |
| 上一篇： | 未上市科網精英 透視出投資方向 |
