熱門:

2015年11月11日

麥狄文 金融街密語

投資高手大家姐傳奇

城中富豪喺海外投資物業又或者炒股投資並唔係乜嘢新鮮事。好似大劉喺倫敦豪宅區掃貨,眼都唔眨一吓,幾乎買咗成條街,早已街知巷聞。

150億台幣購信義大樓

四叔炒股喺2007年一役贏過千億,被封為亞洲股神,亦成為一時佳話。可能係大劉同四叔唔算低調,佢哋啲威水史梗係街知巷聞,其實有唔少低調富豪眼光獨到,同樣係投資高手。今日阿Man就同大家八吓一個低調女富豪嘅投資威水史。

已故南豐話事人陳廷驊長女,人稱大家姐陳大小姐,早已移居美國,過着半退休嘅優閒生活,但喺投資領域上從未有鬆懈過,而且涉獵範疇甚廣,完全係箇中高手。最近轟動台北一宗商廈交易,買家碩河開發以150億元(新台幣.下同)收購中信金信義總部大樓,碩河開發其中一個股東子樂開發背後金主,正正就係大家姐。呢單交易喺上個月完成,震驚整個台北房產市場,除咗係150億(約35.5億港元)唔係一個細數目,以目前台灣不動產市場面臨不景氣中,呢個價錢實在令市場鼓舞,而當地亦廣泛報道呢單交易。

阿Man聽聞,台灣當地有人對於碩河開發高價收購中信金信義部大樓,感到嘩然,甚至認為出價過高,因為明年台灣總統大選,房地產市場可能出現動盪。甚至質疑呢單交易嘅操盤手,私募基金亞太置地(APL)前台灣區總經理詹偉立買貴貨。其實以詹偉立過去戰績,基本上外界唔應該有懷疑,其中一單最為人津津樂道嘅交易,係2010年,以30.5億元收購西門町新萬國廣場商業大樓,經重新改裝及招商,將本來租金回報率拉高,兩年後再以67億元租金、收益率3.5%,賣畀富邦人壽,短短兩年獲利一倍有凸。

Facebook上市獲利豐厚

今次呢項交易大家姐佔份六成,而且「晒士」又唔細,大家姐搵得詹偉立,梗係相信佢嘅往績,同樣亦相信自己眼光,皆因大家姐本身就係一個投資高手。阿Man收到風,當年科網股爆破後,大部分投資者都唔睇好科網公司前景,偏偏大家姐就獨具慧眼,以超低價收購咗一間科網公司,而呢間公司喺Facebook好早期時候,就認購咗大批Facebook的option,結果係點有目共睹。Facebook上市後,呢批option何止身價10倍,增值係以百倍計,聽聞單係操作呢單交易嘅中間人都獲得億億聲報酬,大家姐賺幾多,大家心中有數。

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads