《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2018年12月12日
睇過好多同學創作嘅故事；「夢想」係常見主題之一。最典型嘅思路係：主角有一個夢想，十居其九都係同體藝相關，例如做歌手、做Dancer、成為足球員之類，然後遇上父母或老師反對，然後堅持落去，最後得到體諒或支持作結。
首先我會認同同學對「追夢」嘅執着。不過寫故事嘅同學好多根本唔係識音樂、舞蹈、運動，只係一諗起「夢想」兩個字就會好自然去咗呢啲領域入面，而且都係將夢想等同成為職業，又或者係因為坊間太多同類思維嘅作品。
第一個建議：一係就寫自己真真正正嗰樣夢想啦，咁入嚟讀當然就係「拍電影」；一係就去查探下人哋有咩夢想。世界之大，會有意想不到嘅發現。
有人嘅夢想係帶自己患癌病嘅家人搭一次飛機；有人係聯繫食肆發起「待用便當」去幫助溫飽不得嘅人；有人係想去推廣Cosplay文化……呢啲夢想如果用嚟做故事，咁會有多啲獨特嘅畫面。
第二個建議：係一定要逆向思考。當人人心底裏都覺得追夢可貴，無可辯駁嘅時候，要諗更多有力嘅理由去反對：「夢想其實係微不足道嘅」。再因應呢啲理由設置障礙，畀你嘅主角去面對。
古往今來，最可歌可泣嘅夢想都係「雖千萬人，吾往矣」。但千祈唔好忽略上一句：「自反而縮」，反覆思量，判定自己要做嘅事真係理直氣壯，正因為理直氣壯，所以面對千軍萬馬，至唔會中途質疑自己，打退堂鼓。
人人都記得「黑人民權之父」馬丁路德金有一個「我有一個夢」嘅演說，但好少人會記得佢個「夢」嘅具體內容：「我夢想國家會崛起，真正實現國家信條：真理不言而喻，人人生而平等。」「我四個孩子將來喺一個係以品格而唔係膚色去評價人哋嘅國家生活。」而家睇落「阿媽都係女人」嘅道理，曾幾何時係少數人窮一生精力去說服人哋接受嘅目標。
個人嘅力量相當渺小，渺小到不斷要有人靠神話、小說、電影嚟說服我哋：個人力量可移山填海，力抗歌利亞。但現實就係我哋不斷遇上挫折、失敗同背叛，甚至要為夢想賠上青春、前途同幸福。人一世、物一世，如果咁易就可以放棄，其實係印證個夢想真係微不足道，戲中主角係自作多情。
第三個建議：個夢想要關於別人，多過關於自己。
如果你想做嘅事係關乎別人嘅幸福，四方八面會更加肉緊主角嘅成敗。或者會有更多同道中人願意伸出援手去幫助你。呢個主角先配得上成為故事真正嘅Hero。
訂戶登入
