熱門:

2018年11月14日

陳心遙 視線所及

你孤獨嗎

今年情人節,英國廣播公司做咗一個關於孤獨嘅研究,喺網上收番來自237個國家或地區、5萬幾份問卷。唔知係咪因為網上做嘅關係,令調查偏頗,研究發現以16至24歲呢個年齡組別覺得孤獨嘅人最多。但同時好多老人都聲稱喺16至24歲係人生最孤獨嘅時候。

咁呢啲人有乜方法幫助自己:調查結果發現:最多人揀嘅係「分散注意力」,將自己埋首喺工作、學習或者興趣之上。排第二嘅係出去social clubbing。排第三係「令自己思想更正面」;當然呢樣知易行難。有認知心理學嘅方法令人更易信任他人,從而肯同人分享自己感受。例如:當有人冷待你嘅時候,你可能會假設係人哋唔鍾意你。但你諗深一層,其實你冇證據去證明。咁你就要同自己講其他嘅可能性;譬如係對方太攰或太忙等等。

BBC報道訪問咗一個剛剛踏入30歲嘅女仔。佢開咗一個部落格公開討論佢嘅孤獨;佢話即使有人關懷,仍然會選擇自己一個人去處理人生各項問題。不過佢會覺得好乏味,尤其係好天氣嘅時候,佢眼見人哋三五成群喺戶外有講有笑,佢就想參與其中。有時候佢會用消費購物去排解寂寞,買好多佢根本就唔需要嘅嘢,雖然唔係好方法,但至少佢可以將自己融入咗喺人群入面。

好多人話悶就應該去拍拖,佢話冇錯有拖拍期間佢覺得冇咁孤獨;但同時佢時刻提醒自己,就算有男朋友一樣會覺得孤獨。

自從佢開咗部落格同人分享對付孤獨嘅感受之後,佢自己都搵到治療自己嘅方法,就係聽音樂。好多人同佢談論現場音樂會嘅種種趣事,佢而家甚至考慮喺倫敦搞一間小型嘅場地,舉辦專為寂寞的心而設嘅音樂會。佢話其實好微小嘅友善舉動都可以幫到人,一個微笑,一個問候,搭一搭膊頭都可以令本來痛苦嘅人稍稍振奮。

互聯網有時拉近人與人之間嘅距離,有時又將人分隔得愈嚟愈遠。好在好多人已經發現,一味放閃或一味放負都唔係好現象嚟。無論親人朋友,定係素未謀面嘅網友,好多時我哋都冇辦法分擔人哋要承受嘅痛苦,解決人哋嘅天大難題;但至少我哋可以待人以誠,唔好落井下石,唔好伸多兩腳,尤其係對自己唔認識嘅人,唔好以為隔住個芒就不負責任。能量係人傳人嘅,一個城市集體無助同悲情,宏觀結構上暫時我哋無力解救。但微觀嘅關係我哋可以出心出力,真誠嘅關懷同盲目散發正能量,係有好大區別嘅。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads